JEREMIA 11 - BUKUIT NE TILIIL Sireet ne Dutero Kanon

Jeremiah ak riibetap kayomiset

¹ Ki nyoonji `ng'olyootap Kamuktaindet ne Toroor Jeremiah koleenji,

² “Ogas ng'aleegap kayomisoni, yeityo ong'alaalji piigap Judah ak piik che menyei Jerusalem.

³ Mwachi icheek ileenji, mwaei Kamuktaindet ne Toroor, Kamuktaindetap Israel, kole, chuboot chiito ne ma kasei ng'aleegap kayomisoni,

⁴ ne ki ang'at kwanisyekwok eng' peetuut ne ki amutu icheek komong' eng' emetap Misiri, komang'une maatap karnet ak aleenji, ‘Ogas iit kutinnyu ak oyai chooto, ko uu tugul che ang'atook, si oegu piikyuk anyun ak aegu Kamuktaindeng'wong'.

⁵ Si kobiit agimiit kayasyoet ne ki ayosyechi kwanisyekwok, ale agoochini icheek emet ne nyiitaat cheego ak komi kumyat eng' chaang'indo, ko uu rani.’ ” Ki awolu anyun, ale, “Amen, ee Kamuktaindet ne Toroor.”

⁶ Ki leenjo kogeny anyun `Kamuktaindet ne Toroor, mwaite ng'aleechuuto tugul eng' nganasoogap Judah ak eng' ortinwegap Jerusalem, ileenji, ogas ng'aleegap arorutyoni ak oyai.

⁷ Amu ki abaoryanji kwanisyekwok eng' kagiiletapkei, kobooch peetuut ne ki amutu icheek komong' eng' emetap Misiri, agoi ra, ang'eete karon ak abaoryanjini, aleenjini, ogas iit kutinnyu.

⁸ Ago ma kas iit, ama ep iit, ago kiwendot age tugul eng' uuindap muguleldanyi ne ya. Aipchini anyun icheek ng'aleek tugul che po kayomisoni, ne ki kang'at icheek koyai, ago ma yai.

⁹ Kimwaiwo kogeny koleenjo Kamuktaindet ne Toroor, “Miitei chaamset kwenutap piigap Judah ak eng' piik che menyei Jerusalem.

¹⁰ Ki koweekyigei tengekwogigap kwanisyekwak, che ki eesyo kogas ng'aleekyuk, ak ki isup kanamonik koot. Ki kobut kayomisennyu kootap Israel ak kootap Judah ne ki kayai kobooto kwanisyekwak.

¹¹ Ara amwae anyun anee Kamuktaindet ne Toroor ale, ogeero, aipchini icheek yaityet, ne ma imuuchi kochililee. Ririirchino, ago ma kasyini icheek.

¹² Eng' yooto anyun kobendi nganasoogap Judah ak piik che menyei Jerusalem, kobendi koriirchin kanamonik che igoochin nyamdutik. Ago ma saru icheek agot kitigin eng' peetuutap nyalildanywa kanamonichooto.

¹³ Amu ko uu ole tee koitetap nganasoguk, ko uu nooto kanamoniguk, ee Judah. Ak ko uu ole tee koitetap ortinwegap Jerusalem, ko uu nooto ki olumde kapkorosusyegap kiit ne kililane, kapkorosusyek che kibeeljine Baal nyamdutik.

¹⁴ Amesaa anyun agobo pichu, ameriir anan isaa agobo icheek. Amu ma agase icheek eng' peetuut ne riirchino amu nyalildanywa.”

¹⁵ Tinyei iman nee chamanennyu eng' koonnyu, amu ki koyai tengek? Tos saruun kayasyosyek ak panyeek che itabaanatiin kong'eetee yaityoni? Tos ye iyae tengek ibaibaitu.

¹⁶ Kiguure Kamuktaindet ne Toroor kaineng'ung', Emdit ne tuon, ne karaaran ak kotinyei logoek che myach. Ki ilaal maat eng' yooto eng' polatetap wasetapkei ne oo ak kagoilyo mooriikyik.

¹⁷ Amu kagomwa Kamuktaindet ne Toroor ne po lugoosyek, ne kiminin, yaityet agobo inyee, amu yaityetap kootap Israel ak ne po kootap Judah, che ki koyachigei kotacha anereech amu ki igoochi Baal nyamdutik.

Chaamset agobo pareetap Jeremiah

¹⁸ Ki koono Kamuktaindet ne Toroor naet agobo chaamsennywa ak ki anai. Ki iboorwo ineendet poisyonikwak.

¹⁹ Ago ki auu aarwetap keechiir ne tala, ne ki kweryei kwo ole kieng'e; ak ki ma anai ale Ki kochop `icheek chobutik che yaacheen agobo anee, kole, ongeng'em keetit kobooto logoekyik, ak ongeiste ineendet eng' emetap che saptos, si mata kibwaat kainennyi kogeny.

²⁰ Ago, koono ageer yaaktaeng'ung' po mugetuut eng' icheek, ee Kamuktaindet ne Toroor ne po lugoosyek, ne irwoochi eng' imanda, ne ityeme kabwaatutik ak muguleldo, amu kaang'ang'un ng'olyoondennyu.

²¹ Nooto anyun amu nee si komwaei Kamuktaindet ne Toroor agobo piigap Anatoth, che cheeng'ei saboondang'ung', kole, “Amat imaoten eng' kainetap Kamuktaindet ne Toroor, si ma ki parin acheek.”

²² Mwaei anyun Kamuktaindet ne Toroor ne po lugoosyek kole, “Abire icheek. Pegu neranik eng' rotwetap chok, parei rubeet weeriikwak ak tiibiikwak,

²³ ama piitu che ng'etu eng' icheek. Amu aipchini yaityet piigap Anatoth, eng' kenyiit ne agikyini icheek abire.”