JEREMIA 1 - BUKUIT NE TILIIL Sireet ne Dutero Kanon

Kuursetap maotyot Jeremiah

¹ Chu ng'aleegap Jeremiah weeriitap Hilkiah, ne ki agenge eng' tisiik che ki mi Anatoth eng' emetap Benjamin.

² Ki nyoonji `ng'olyootap Kamuktaindet ne Toroor ineendet eng' peetuusyegap Josiah weeriitap Ammon laitoryatap Judah, eng' kenyiitap taman ak somok ne po laitornatennyi.

³ Ki nyo kogeny eng' peetuusyegap Jehoiakim weeriitap Josiah, ak agoi kogeskei kenyiitap taman ak agenge ne po Zedekiah weeriitap Josiah laitoryatap Judah, ye ki kiluul Jerusalem kimut eng' arawetap muut.

⁴ Ki nyoonjo anyun ng'olyootap Kamuktaindet ne Toroor koleenjo,

⁵ “Ye kitom amimiin eng' moet, ko ki angenin, kotom kesichin, ko ki atabaanin, ki andein iegu maotyot eng' pororyosyek.”

⁶ Ki amwa anyun ale, “Ee, Kiptaiyat Kamuktaindet ne Toroor! Keero, anee koma muuchi ang'alaal, amu aa lakwa.”

⁷ Ago ki leenjo `Kamuktaindet ne Toroor, “Amele, Aa lakwa; amu iwendi ye mi piik alak tugul che ayooktochinin, ak imwae kiit age tugul ne ang'atiin.”

⁸ Meiywei icheek, amu ami kobooten ak asaruun, mwaei Kamuktaindet ne Toroor.

⁹ Kochuul anyun Kamuktaindet ne Toroor eunnyi ak kotiiny kutinnyu, ak koleenjo, “Kande nguno ng'aleekyuk kuting'ung'.

¹⁰ Keero, kandein rani ibou pororyosyek ak pounatosyek, itutu ak ibut, ing'em ak igabui, iteech ak imiin.”

Keerutik aeng'

¹¹ Ki nyoonjo ng'olyootap Kamuktaindet ne Toroor, koleenjo, “Jeremiah, igeere nee?” Ak ki awolu ale, “Ageere temeet ne po keetit ne kiguure almond.”

¹² Yeityo koleenjo Kamuktaindet ne Toroor, “Kegeer komyee, amu ko uu ye sip koiyei taaptook keetitap almond kosiir keetiik alak, ariibe ng'olyoondennyu asi si ayai kosulda.”

¹³ Ak ki nyoonjo kogeny ng'olyootap Kamuktaindet ne Toroor ne po aeng', koleenjo, “Igeere nee?” Ak ki ale, “Ageere tereet ne wasegei ak tokyingei teronooto murot tai.”

¹⁴ Yeityo koleenjo Kamuktaindet ne Toroor, “Mang'une yaityet murot kaataam, konyonjin piik tugul che po emet.”

¹⁵ Keero, aguure ortinwek tugul che po pounatosyegap murot kaataam, mwaei Kamuktaindet ne Toroor, ak kobwa ak konde age tugul ng'echerennyi ne po laitornatet ye kimandoe eng' ormariichogap Jerusalem, ak kotokyigei irimoikyik tugul ak kotokyigei nganasook tugul che po Judah.

¹⁶ Ak amwa kirwoogutikyuk agirindae icheek, agobo yaityennywa tugul amu ki kometa, ki kobeelji nyamdutik kanamonik che teer, ak kolas poisyonigap eunekwak.

¹⁷ Kermenge anyun, yetyo ing'eet ak imwachi icheek tuguuk tugul che ang'atiin. Ametoptoben amu icheek, si ma koonin itoptoben eng' tainnywa.

¹⁸ Keero, kayain peetuuni iegu nganaseet ne riiboot, toloitap karnet, ak irimoigap sugunwet, si igirinde emet komugul, igirinde laitorinigap Judah ak pounikyik, tisiikyik ak piigap emet.

¹⁹ Ibookyin icheek, ago ma iterteerin; amu ami kobooten, si asaruun, mwaei Kamuktaindet ne Toroor.