JAKOBO 3 - BUKUIT NE TILIIL Sireet ne Dutero Kanon

Kanyool keboi ng'elyepta

¹ Amat koek che chaang' eng' okweek kaneetik, tupchosyekyuk, ongen ole tuun kinyooru kirwooget ne oo miising'.

² Amu kibutosi acheek tugul eng' tuguuk che chaang'. Ngot koma ibut chii age tugul eng' ng'olyoo, kogesunotkei chiichooto, ak komuuchi koriip poorto komugul agine.

³ Ngot kinde kariik kutusweegap paraisisyek, si kobiit kogaseech iit, keeweechi poorwekwak tugul ak icheek.

⁴ Ogeer melisyek ak icheek, nganda eecheen miising', ak koonati usoonaik che kiimeen, keeweege pagoiyot ne ming'in ne kindochine, kwo ole makyin ne kweryei.

⁵ Uu nooto agine ng'elyepta, kebeberta ne ming'in, ak kolosegei eng' tuguuk che eecheen. Ogeero, peelei maat ne ming'in kweenik che tya!

⁶ Ak ng'elyepta ko maat. Ng'wonyut ne po tengekto eng' kebeberwekyok ko ng'elyepta, ne imurwoni poorto komugul, ak konaami maat eng' pandap chii kotee kosabei ak kinaami eng' maatap Gehenna.

⁷ Amu kibaei tyong'ik alak tugul, ak toriitik, ak tuguuk che ichuutegei ak tuguuk che miitei nyanjet, ko ki kobai piik;

⁸ ago ma imuuchi chii koboi ng'elyepta: yaityet ne ma pounaksei, ne nyiitaat ng'wonetap meet.

⁹ Kilasune nooto Kiptaiyat ak ko Kwanda: ak kichube piik, che ki kiyai eng' kergeindap Kamuktaindet:

¹⁰ punu kutit agenge kaberuret ak chubisyet. Che kitupche, ma nyolu kotep ko uu niito tuguuchuuto.

¹¹ Tos kutune konda agenge peek che anyiny ak che ng'woneen?

¹² Che kitupche, imuuchi `mogoywet koii mseituni? Anan koii keetitap `sabibuk logoegap mogoonik? Amaimuuchi peek che myach kobiitune che po muunyuk.

Utaatyet konyil Aeng'

¹³ Ng'oo ne utaat eng' okweek ak koguitos? Ingobarta poisyonikyik eng' atebeet ne myee eng' kaming'inetapkei ne po ng'omnateet.

¹⁴ Ago ngot otinye ng'etkonda ne ng'waan ak toiyet eng' mugulelwekwok, ko matoloske, amat omwa lembech agobo imanit.

¹⁵ Ma punu parak utaatyoni po ng'wony, po poorwek, po oindet.

¹⁶ Amu ole miitei ng'etkonda ak toiyet, komiitei polateet ak yautyet age tugul ne ya.

¹⁷ Ago utaatyet ne punu parak ko ne tai ko tiliil, yeityo ko po kaalyeet, ak komuitoi, ak kasei kiy ne kimwachin, ak ko nyiitaat rireenet ak logoek che myach, ama walaksei, ama tinyei chombilet.

¹⁸ Ak kegolei logoegap imanda eng' kaalyeet agobo icheek che yaei kaalyeet.