ISAIAH 66 - BUKUIT NE TILIIL Sireet ne Dutero Kanon

Kirwooget ak kamang'unet

¹ Mwaei Kamuktaindet ne Toroor kole, kipsengwet ko ng'echerennyu ne po laitornatet, ak ng'wony ko ng'echereetap keelyekyuk: oteekwo koot ne uu nee? Ak komosta ano ole amuung'e?

² Amu kiyaei eunnyu tuguuchuuto tugul, ak ki piit anyun tuguuchuuto tugul, mwaei Kamuktaindet ne Toroor; ago ageni ineendet ne panan ak konyerategei eng' muguleldo, ne potani amu ng'olyoondennyu.

³ Ineendet ne parei teta ko kergei ak ineendet ne parei chiito; ineendet ne igoitoi aarwetap keechiir koek tiseiywot, ko kergei ak ineendet ne iriei kaatitap seset; ineendet ne igoitoi kagoochinetap peek ko kergei ak ineendet ne igoitoi korotiigap toret; ineendet ne peelei tuguuk che nyamdut ko kergei ak ineendet ne iberuuri kanamwet: ee, ki kolewen ortinwekwak ak kochamei saboonwekwak tuguukwak che kiwechei;

⁴ alewenjini anyun kaberberisyosyekwak, ak aipchi icheek kaiyweisyosyekwak; amu kinga kuurse, koma wol chii; ye kinga ng'alaal, koma kas icheek: ago ki yai tuguuk che yaach eng' tainnyu, ak kolewen tuguuk che ma abaibaitune.

⁵ Ogas ng'olyootap Kamuktaindet ne Toroor, okweek che obotandosi amu ng'olyoondennyi: Ki komwa che otupche icheeget che wechok, che kitimdak agobo kainennyu, kole, ingitoroor Kamuktaindet ne Toroor, si kobiit kegeer poiboiyeng'wong'; ago ililandos.

⁶ Waagaat ne po wasetapkei ne punu nganaseet, waagaat ne punu Hekaluut, kutitap Kamuktaindet ne Toroor ne yaaktochin mugetuut puunikyik.

⁷ Ki sigis amanyoor ng'wanindo; ki sich weeriit kotom kogas ng'wanindo.

⁸ Ki kogas ng'oo ng'olyoot ne uu ni? Ki kogeer ng'oo tuguuk che uu chu? Tos kisichei emet eng' peetuut agenge? Tos kisichei pororyet eng' sait ne matya? Amu ki sich `Zion lagokyik, eng' sainooto ki nyoorunee ng'wanindo.

⁹ Tos aeete kesich lakweet ne kogoyam kesich? Mwaei Kamuktaindet ne Toroor. Tos arate moet ne agoochini kooi? Mwaei Kamuktaindeng'ung'.

¹⁰ Oboiboitu okweek kobooto Jerusalem, ogaaskei kobooto ineendet, okweek tugul che ochame ineendet: oboiboitu eng' poiboiyet kobooto ineendet, okweek tugul che oriirchini:

¹¹ si kobiit ochuchun obiyong'se eng' kainaigap kagaigaosyekyik; si kobiit ochuchun tugul, ak oboiboitune chaang'indap toroornatennyi.

¹² Amu mwaei Kamuktaindet ne Toroor kole ogeero, atesyini kaalyeet ko uu aineet, ak atesyi toroornatetap pororyosyek ko uu kereruut ne ing'irtogei, ak ochuchun; ki isyinok usia, ak ketinyok kigaigaak.

¹³ Agoigook ko uu ineendet ne igoigoi kamet; ak kigaigaak eng' Jerusalem.

¹⁴ Ak ogeero, ak koboiboitu mugulelwekwok, ak kong'atyo kawekwok ko uu susweek che ng'orng'or: ak konaak eutap Kamuktaindet ne Toroor eng' otwogikyik, ak konereekyi puunikyik.

¹⁵ Amu ogeero, nyoonei Kamuktaindet ne Toroor eng' maat, ak koigei kariisyekyik che po lugeet kipchurchuryet; koyaakta nereegekyik eng' koroomnateet, ak koyaakta kerennyi po kong' eng' liplibenetap maat.

¹⁶ Amu irwooksechin `Kamuktaindet ne Toroor piik tugul eng' maat ak eng' rotwennyi po chok: ak kochang'a che parei Kamuktaindet ne Toroor.

¹⁷ Mwaei Kamuktaindet ne Toroor kole, igesugei icheek tugul che ianyinyegei ak kotiliilegei si koba mbareenik, kosubotkei ak koamei panyeegap toorook, ak che kiwechei, ak mureek.

¹⁸ Amu angen poisyonikwak ak kabwaatutikwak: nyoonei peetuut, ye ayumi pororyosyek tugul ak kutusweek tugul; ak kobwa ak kogeer toroornatennyu.

¹⁹ Ak ande kaboorunet kwenunnywa, ak ayookte che chilildos eng' icheek koba pororyosyek, koba Tarsis, Pul ak Lud, che ng'iei kwanget, agoi Tubal ak Javan, agoi ngeguusyek che looen, che tomo kogas agobo kalasunennyu, anan kogeer toroornatennyu; ak komwaita toroornatennyu eng' pororyosyek.

²⁰ Ak komut tupchosyekwok tugul komang'une pororyosyek tugul koek kagoochinet eng' Kamuktaindet ne Toroor, kobunu paraisisyek, ak kariisyek, ak chepkichutit, ak eng' nyumbusyek, ak tambeesik, kobwa tulweennyu ne tiliil Jerusalem, mwaei Kamuktaindet ne Toroor, ko uu ye ibu lagogap Israel kagoochinennywa eng' tereet ne tiliil konyo kootap Kamuktaindet ne Toroor.

²¹ Ak ande alak eng' icheek kogeny koek Tisiik ak Lawiik, mwaei Kamuktaindet ne Toroor.

²² Amu ko uu ye tebee tainnyu kipsengwet che leelach ak ng'wonyut ne leel, che ta ayae, ko uu nooto tebyei iyoteng'wong' ak kaineng'wong' eng' tainnyu, mwaei Kamuktaindet ne Toroor.

²³ Ak tuun pwoonei piik tugul koloswa eng' tainnyu kobooch ye kaleel arawet agoi koleel age, ak kobooch sabato age agoi sabato age, mwaei Kamuktaindet ne Toroor.

²⁴ Ak komanda koba kogeer muuswegap piik che ki ingelelja: amu ma pegu kutikwak, ama kimisi manywa; ak koek che wechei piik tugul.