ISAIAH 64 - BUKUIT NE TILIIL Sireet ne Dutero Kanon

¹ Kata myee ibet kipsengwet, ak ichooruge, si kobiit kobotanso tuloonook eng' taing'ung';

² ko uu ye peelei maat sigorik, ak ko uu ye iguuti maat peek: si kibarta kaineng'ung' konaak eng' puuniguk, si kobotanso pororyosyek eng' taing'ung'!

³ Ye ki ngiyai tuguuk che po kamuiset che ki ma kicheeng', ki ichooruge, kibotanso tuloonook eng' taing'ung'.

⁴ Amu tomo kogas piik kobooch keny, anan koguiyo eng' itiik, anan kogeer eng' konyekwak Kamuktaindet age ne ma inyee, ne yaei poisyet agobo chiito ne igeni ineendet.

⁵ Otuitosi ak ineendet ne paibai ak koyaei imanda, icheeget che ibwaatin eng' ortinweguk: keero, ki inereech, ak ki kiyai tengekto: ki keyai chooto peetuusyek che chaang', ak tos kisarwech?

⁶ Amu ki kiige tugul chii ne po simdo, ak uu imandanyo tugul ngoryeet ne murwoon: ak kirestosi acheek tugul ko uu sogoot; ak onech yaitwogikyok ko uu ye onsei usoonet.

⁷ Ama mi ne kuurei kaineng'ung', ne igiilegei si kobiit konamin: amu ki iung'enech togeng'ung', ak ki igeswech amu tengekwogikyok.

⁸ Nganda uu nooto, ee Kamuktaindet ne Toroor, inyee ko ii kwandanyo. Ki meneet ak inyee ko ii mimiindennyo; ki poisyonigap euneguk acheek tugul.

⁹ Amat inereech miising', ee Kamuktaindet ne Toroor, amat ibwaat tengekto agoi! Keero, keer komyee, kisaain, ki piiguk acheek tugul.

¹⁰ Ki koek ong'ateet nganasoguk che tiliileen, koek Zion surkwen, koek Jerusalem karaatya.

¹¹ Kigebeel koonnyo ne tiliil ne karaaran, ole kilasunenen kwanisyekyok; Ki kong'emogis tuguukyok tugul che korooron.

¹² Ee Kamuktaindet ne Toroor, tos ta iranyegei eng' tuguuchooto? Tos isise, ak inyalilech miising'?