ISAIAH 62 - BUKUIT NE TILIIL Sireet ne Dutero Kanon

Kainet ne leel ne po Zion

¹ Masise agobo Zion, amamuunyi agobo Jerusalem, agoi komanda imandanyi ko uu kaluunet, ak komanda yetunennyi ko uu tait ne lalei.

² Ak kogeer pororyosyek imandang'ung', ak kogeer laitorinik tugul toroornateng'ung': ak keguurenen kainet ne leel, ne tuun kuurenen Kamuktaindet ne Toroor.

³ Iegu kogeny naaryeetap korooronindo eng' eutap Kamuktaindet ne Toroor, ak iegu naaryeetap laitornatet eng' eutap Kamuktaindeng'ung'.

⁴ Ma keguurenen kogeny Ne Ki kimeto; ama keguure emeng'ung' kogeny Karaita: ago kiguurenen Hepsi-ba, ak keguure emeng'ung' Beula: amu paibaitunenen Kamuktaindet ne Toroor, ak kitun emeng'ung'.

⁵ Amu ko uu ye ituni mureno pergeiyat, uu nooto tuun itunin weeriiguk: ak ko uu ye paibaitu sandet eng' murereet, ko uu nooto, tuun poiboitu Kamuktaindeng'ung' eng' inyee.

⁶ Kande riibiik irimoiguk, ee Jerusalem; ma koi siisyo peet anan kemoi; amomuunyi okweek piik che obwaatyini Kamuktaindet ne Toroor,

⁷ amogoochini ineendet komuuny, agoi kogimit Jerusalem ak koyai koek kalasunet eng' ng'wony.

⁸ Ki koyosyo Kamuktaindet ne Toroor eng' eunnyi ne po tai, ak eng' eutap kimnateennyi, kole, iman, ma agoitoi peeguk koek amitwogigap puuniguk; ama koee toek divaiguk, che ki iyai:

⁹ ago amei icheek che ki konori, ak kolas Kamuktaindet ne Toroor; ak koee icheek che kiyumi, eng' seremusyegap oldanyu ne tiliil.

¹⁰ Omande, omandae ormariichok; ochop ooreetap piik; ochop, ochop ooreet ne oo; oiste koik; onamji parak songolyet agobo piik.

¹¹ Ogeero, kagomwaita Kamuktaindet ne Toroor agoi tabandap ng'wony, kole, oleenji cheptap Zion, Keero, nyoonei yetuneng'ung'; keero, mi melektanyi kobooto ineendet ak mi yaaktaennyi tainnyi.

¹² Ak koguure icheek, Piik che tiliileen, Che ki kotyach Kamuktaindet ne Toroor: ak keguurenen, Ne Ki kicheeng', Nganaseet ne ma kimeto.