ISAIAH 60 - BUKUIT NE TILIIL Sireet ne Dutero Kanon

Toroornatetap Zion

¹ Ng'eet, iluu; amu kagoit lapkeiyeng'ung', ak kagochorchin toroornatetap Kamuktaindet ne Toroor.

² Amu, keero, tuchei mesundeito ng'wony, ak kotuch mesundeito ne oo pororyosyek: ago chorchinin Kamuktaindet ne Toroor, ak kotook toroornatennyi eng' inyee.

³ Ak kobwonji pororyosyek lapkeiyeng'ung', ak kobwonji laitorinik kaluunetap choruneng'ung'.

⁴ Ing'eet met ak igeer komoswek tugul: iyumigei icheek tugul, ak kobwonjin: punu weeriiguk ole loo, ak keganabu tiibiiguk.

⁵ Igeer anyun ak kikwenyin, ak kobotan muguleldang'ung' ak ki paraa; amu pwonjinin chaang'indap nyanjosyek, pwonjinin mogornatosyegap pororyosyek.

⁶ Tuchin chaang'indap tambeesik, kobooto moegap tambeesik che po Midian ak Ephah; punu tugul Sheba: ibu thahabu ak tuguuk che nyamdut, ak komwaita kalasunoigap Kamuktaindet ne Toroor.

⁷ Kiyumjinin akwotisyek tugul che po keechiiregap Kedar, koboisyeun mengichigap Nebaiot: pwoonei amu taachaksei eng' kaptisisyennyu, ak atoroori kootap toroornatennyu.

⁸ Ng'oo chu rwaei ko uu pooldet, ak kotirirendos cheptugenik eng' tirisyokwak?

⁹ Igeno iman ngeguusyek, ak sip kogeno melisyek che po Tarsis, si kobiit komut weeriiguk eng' ole loo, koibu fedhaisyekwak ak thahabusyekwak, agobo kainetap Kamuktaindet ne Toroor Kamuktaindeng'ung', ak agobo Ineendet ne Tiliil ne po Israel, amu ki kotoroorin.

¹⁰ Ak koteech toek irimoiguk, ak koboisyeun laitorinikwak: amu ki abirin eng' nereegekyuk, ago ki ariirenen amu chamennyu.

¹¹ Kiyatei kogeny ormariichoguk kotugul; ma kigerei peet anan kemoi; si koibun piik mogornatosyegap pororyosyek, kobooto laitorinikwak che kimutu.

¹² Amu lusei pororyet ak pounateet ne ma poisyeun; ee, king'emei pororyosyechooto kobetyo.

¹³ Nyonjinin toroornatetap Lebanon, kobooto piribirinik, taragonik che sabuleen, ak taragonik che teer; si koyai konyool oldanyu ne tiliil, ak achop ole tebee keelyekyuk kogararanit.

¹⁴ Ak kobwonjin weeriigap icheeget che ki inyaliilin kong'uruugonu; ak kogutung'so eng' keldebesaigap keelyeguk icheek tugul che kisasin; ak koguurenen, Nganaseetap Kamuktaindet ne Toroor, Zion ne po Ineendet ne Tiliil ne po Israel.

¹⁵ Ak ko uu ye kiga kebagaakten, ak kewechin, kot ko ki ma kota komi chii ne kibunei kwenung'ung', ayain anyun iegu telunateet ne po koigeny, poiboiyetap ibinwek che chaang'.

¹⁶ Ichuchuni kogeny cheegap pororyosyek, ak irerye kinaigap laitorinik: si kobiit inai ile anee Kamuktaindet ne Toroor, ko aa yetindeng'ung', ak ko katyagindeng'ung', Ineendet Ne po Kamuktaet ne po Jakobo.

¹⁷ Aibu thahabu ageere sugunonik, ak aibu fedha ageere kariik, ak ageere sugunonik keetiik, ak ageere kariik koik: ak ayai kogeny kiptainiguk koek kaalyeet, ak ayai kayagiguk koek imanda.

¹⁸ Ma kegasei kogeny koroomnateet eng' emeng'ung', anan kobiit kubernateet ak ng'emisyet eng' kiwotosyeguk; ago tuun iguure irimoiguk Yetunet, ak iguure ormariichoguk Kalasunet.

¹⁹ Ma koegu asiista lapkeiyeng'ung' peet: ama kogoonin lapkeiyet kaluunetap arawet: ago egu Kamuktaindet ne Toroor lapkeiyeng'ung' ne po koigeny; ak koek Kamuktaindeng'ung' toroornateng'ung'.

²⁰ Ma kororoktoi asiistang'ung', ama komeei araweng'ung': amu egu Kamuktaindet ne Toroor lapkeiyeng'ung' ne po koigeny, ak kogeskei peetuusyegap riireguk.

²¹ Ak koek che po imanda kogeny piiguk tugul, ak koek emet porotennywa koigeny; temeet ne ki amin, poisyetap eunekyuk, si kobiit kegonyita.

²² Egu ne ming'in eliphuut, ak koek ne ming'in pororyet ne kiim: achokyini nooto anee Kamuktaindet ne Toroor eng' peetuunnyi.