ISAIAH 59 - BUKUIT NE TILIIL Sireet ne Dutero Kanon

Tengekto, ng'ang'et, ak katyaknatet

¹ Ogeero, ma nwach eutap Kamuktaindet ne Toroor, kot koma imuuch kosar; ama nyigiis itinnyi, kot koma imuuch kogas:

² ago ki kobesyenok tengekwogikwok Kamuktaindeng'wong', ak kigouny tengekwogikwok togeennyi, kot koma kochamei kogas.

³ Amu murwonen eunekwok eng' korotiik, ak ko murwonen morikwok eng' tengekto; kogomwa kutusweekwok lembechek, ng'alaali ng'elyebwekwok yaityet.

⁴ Ma mi agot agenge ne cheeng'ei imanda ne po kirwooget, ama mi ne ibei ng'aleek che po iman kapkirwook: imang'u icheek tangoita, ak komwaei lembechek; manachi yaityet, ak kooi tengekto.

⁵ Igenyi koigap ereneet, ak kola kootap kibroroktet: meei ne amei koikwak, ak mang'une ereneet koita ne kagitui.

⁶ Ma egu kooriigap kibroroginik ngoroik, ama tugegei poisyonikwak: poisyonikwak ko poisyonigap yaityet, ak komi eunekwak poisyetap koroomnateet.

⁷ Ruachin keelyekwak yaityet, ak kochoktoi kotumda korotiik che ma tinyei tengek: kabwaatutikwak ko kabwaatutigap tengekto; mi ortinwekwak kubernateet ak ng'emisyet.

⁸ Ma ingen icheek ooreetap kaalyeet; ama mi kirwooget eng' ortinwekwak: ki koyachigei ortinwek che kunuuren; ma ingen kaalyeet age tugul ne punei olooto.

⁹ Loo anyun kirwooget eng' acheek, ama nyoorwech imanda: kicheeng'e lapkeiyet, ago ogeero, mi mesundeito; kicheeng'e kakweng'et, ago kibendote mesundeito.

¹⁰ Kisapsabisyoti kecheeng'e inaatut ko uu kipkoratinik, ee, kisapsabisyoti ko uu che ma tinyei koonyek: kibutyoti peet kween ko uu ye karatarat; ki uu che ki kobek ye kimi kwenutap che neryootiin.

¹¹ Kimorori tugul ko uu magalaluusyek, ak kitigendosi miising' ko uu cheptugenik: kicheeng'e kirwooget, ago ma mi; kicheeng'e yetunet, ago looenech.

¹² Amu ki kotesagis pistaosyekyok eng' taing'ung', ak paoryanjinech tengekwogikyok: amu mi kobootech pistaosyekyok, ak kingen tengekwogikyok:

¹³ ki kieesye Kamuktaindet ne Toroor eng' pistoennyo, ak kigemaste ama kisup Kamuktaindennyo, keng'alaali ng'aleegap sastaet ak ngelelnateet, kichobe eng' mugulelwekyok ng'aleegap lembech, ak kemwae.

¹⁴ Ak kikwa let kirwooget, ak tononi imanda eng' ole loo: amu kagobutyi imanda ooreet, ak ma imuuchi komong' lititindo.

¹⁵ Ee, petoot imanda; ak ineendet ne pagaktoi yaityet koyaegei koek ne kiluulei. Ak ki keer Kamuktaindet ne Toroor niito, ak ma ibaibai ineendet amu ki ma komi kirwooget.

¹⁶ Ak ki keer kole ma mi chii age tugul, ak ki kwong' amu ki ma komi ne sachin age: ki ipchigei anyun yetunet eng' eunnyi; ak kiti imandanyi ineendet.

¹⁷ Ak ki ilaach imanda ko uu karnetap tegeet, ak chepkulet ne po yetunet eng' metinnyi; ak ki ilaach ngoroigap yaaktaetap mugetuut, ak ki ilaach kagiiletapkei ko uu sambut.

¹⁸ Yaakyin icheek ko uu poisyonikwak, nereegek che ng'woneen eng' puunikyik, yaaktaet eng' puunikyik; yaakyin ngeguusyek ko uu ye nyoljin.

¹⁹ Iywei anyun kainetap Kamuktaindet ne Toroor eng' cherongo, ak koywei toroornatennyi eng' ole charunee asiista: amu nyoonei ko uu aineet ne isururtoi, ne oonei kabuusetap Kamuktaindet ne Toroor.

²⁰ Ak konyo katyagindet Zion, ak konyonji icheek che po Jakobo che metoi pistoet, mwaei Kamuktaindet ne Toroor.

²¹ Ni anyun kayomisennyu ne kiyomisyinige ak icheek, mwaei Kamuktaindet ne Toroor: ma istoegei kuting'ung' Kabuusennyu ne miten ak ng'aleeguk che kiande kuting'ung', anan eng' kutitap iyoteng'ung', anan eng' kutusweegap mochogoroniguk, mwaei Kamuktaindet ne Toroor, kobooch nguno agoi koigeny.