ISAIAH 58 - BUKUIT NE TILIIL Sireet ne Dutero Kanon

Karugutetapkei ne po iman

¹ Waach miising', amesiis, waach ko uu iryageet, ak imwachi piikyuk pistoennywa, ak imwachi kootap Jakobo tengekwogikwak.

² Ago cheeng'a peetuut age tugul, ak chamei konai ortinwekyuk: ko uu pororyet ne ki yai imanda, ama meto kirwoogetap Kamuktaindennywa, teebena kirwoogutik che po iman, chamei koriikyi Kamuktaindet.

³ Mwaei icheek kole, amu nee si kirugutige, amegeere? Amu nee si kinyalil acheek saboonwekyok, amemage kiy? Ogeero, onyooru poiboiyeng'wong' eng' peetuutap karuguteng'wong' pogei, ak omage piik tugul che poisyewok tuguuk che siirtoot.

⁴ Ogeero, orugutige agobo pooryeet ak suryet, ak olugisye yaityet: morugutige eng' peetuuni si kegas kuting'wong' eng' ole po parak.

⁵ Tos nooto karugutetapkei ne ki alewen? Peetuut ne inyalili chii saboondanyi? Koabuch chii metinnyi ko uu mutwot, ak kosyep kuniok ak oreek? Tos oguure niito karugutetapkei, peetuut ne taachaksei eng' Kamuktaindet ne Toroor?

⁶ Tos ma karugutetapkei ni ne ki alewen: ale kityaach ratuutigap yaityet, kityaach anoogap chogit, ak keunda che kigetyekyi ng'wony, ak oiri chogit age tugul?

⁷ Tos ma kebae amitwogiguk che amei rubeet, ak imutu kibananook che kigetimda, kobwa koong'ung'? Ye igeer ne mi aach ngor, ituch; ameung'egei piik che po oreng'ung'?

⁸ Koluu anyun lapkeiyeng'ung' ko uu karonet, ak kobiit kasoobeng'ung' kochook: ak kondoenen imandang'ung' ak koletun toroornatetap Kamuktaindet ne Toroor.

⁹ Yeityo anyun iguurse, ak kowolun Kamuktaindet ne Toroor; iguure, ak kole, Ami yu. Ngot iiste chogit eng' kwenung'ung', kang'wererisyet, ak ng'alaalet ne ya;

¹⁰ ak ngot iriiree che amei rubo, ak ibai kobiyo saboondo ne kinyaliili: kochor anyun lapkeiyeng'ung' eng' mesundeito, ak koigei peet kween mesundeitang'ung'.

¹¹ Ak kondoun Kamuktaindet ne Toroor kotugul, ak kogoochi saboondang'ung' kobiyo eng' komoswek che yamyotiin, ak kogimit koweguk; ak iige mbareet ne kibisi, ak iige kereruut ne ma teenyei.

¹² Ak koteech piiguk karotwek che po keny: ak ing'eet lumeiywegap ibinwek che chaang'; ak keguurenen, Teegindetap ole kibutok, Kaweegunindetap ortinwek che itebee.

¹³ Ngot iiste keeldong'ung' eng' peetuutap sabato, ameyai tuguuk che ichame eng' peetuunnyu ne tiliil; ak ile poiboiyet peetuutap sabato, ne tiliil ne po Kamuktaindet ne Toroor, ne po teegisto; ak igonyit peetuunooto, amesup ortinweguk, anan icheeng' che ichame, anan imwa ng'aleeguk:

¹⁴ ibaibaegei anyun Kamuktaindet ne Toroor; ak agoonin ilaany komoswek che torooreen che po ng'wony; ak abaenen poroteetap Jakobo kwandang'ung': amu kagomwa niito kutitap Kamuktaindet ne Toroor.