ISAIAH 57 - BUKUIT NE TILIIL Sireet ne Dutero Kanon

¹ Pegu che po iman, ama iiti chii; ak kimuti piik che tinyei riirge, ama ibwaati chii kole, kimuti che po iman si ma keer yaityet ne nyoonei.

² Mong'jin ole mi kaalyeet; imuunyi eng' itogusyekwak, age tugul ne wendoti eng' lititindanyi.

³ Ago oriigu okweek weeriigap chepsogeiyot, iyoteetap chiito ne yaei ibeetapkei ak chepkugoniot.

⁴ Ourerenjini ng'oo? Oseng'eng'jini ng'oo, ak ochuutyini ng'elyepta? Tos ma oo lagogap pistoet, iyoteetap kaberberisyet,

⁵ che olaali mageng'wong' eng' keetiik keel, eng' kelutap keetit age tugul ne tuon; okweek che obare lagok eng' atebwosyek, eng' ole kibetak eng' rwandosyek?

⁶ Mi kebebertang'ung' koik che chaboen che po atebweet; chooto, chooto ko kebebertang'ung': ki iroong'ji icheek kagoochinet ne kieei, ki igoochi kagoochinet. Tos igoigoa tuguuchuuto?

⁷ Kainde itogung'ung' tulweet ne ki wo parak ak ko kooi miising': ak ki iwe kogeny olooto igoite tiseiywek.

⁸ Ak ki itepte kiit ne po kabwaateng'ung' eng' ole po let eng' kereiywek ak tugatugik: amu ki ing'aang'jige age, ne ma anee, ak kiitogoste; ki ibaraa itogung'ung', ak iyai arorutyet kobooto icheek: ichame itogunnywa eng' ole ki igeerchi.

⁹ Ak ki iwe kaplaitoryat iibe mwanik, ak ites nyamdutiguk, ki iyookte piiguk che tononun koba ole loo, ak ki iteweergei agoi ye mi che ki kobek.

¹⁰ Ki ing'et amu koindap oreng'ung'; ago ki ma imwa ile, ma mi kamang'unet: ki inyooru kasoobetap kimnateng'ung'; ma itanui anyun.

¹¹ Ak ki iywei ng'oo anyun ak itoptoben kot imwa lembech, ak ma ibwaata ama chut ng'olyoondoniito muguleldang'ung'? Ma asiis peetuusyek che chaang' ama iywea?

¹² Aboortoi imandang'ung'; ama kelun kiy eng' poisyoniguk.

¹³ Ingosaruun ye iriire, icheek che ki iyum, ago ibei usoonet icheek, ibei kabuuset icheek tugul: ago namei emet kobunji, ineendet ne imang'wa, ak koek tulweennyu ne tiliil porotennyi.

Rireenetap Kamuktaindet

¹⁴ Ak mwaei ineendet kole, oyai, oyai, ochop ooreet, oiste kanagutyet eng' ooreetap piikyuk.

¹⁵ Amu mwaei ko uu ni ineendet ne mi parak ak ko toroor ne menyei koigeny, ne Tiliil kainennyi kole, amenye ole toroor ak ko tiliil, kobooto ineendet agine ne kigonyeratkei eng' muguleldo, ak koming'ingei, si kobiit kisoop muguleldap ne iming'inegei, ak kisoop mugulelwegap che inyeratigei.

¹⁶ Amu ma kibortosi agoi, ama kinereechi kotugul; amu katatanuisyo eng' tainnyu, agot saboonwek che ki ayai.

¹⁷ Amu ki anereech agobo tengektap kasennyi ne po myat, ak abir ineendet, ki auny togeennyu ak anereech: ak kites komaasak eng' ooreetap muguleldanyi.

¹⁸ Ki ageer ortinwekyik, ak asoobi ineendet: andochini kogeny, ak aweekyi ineendet kagaigaosyek kobooto piikyik che riirtos.

¹⁹ Ayae logoegap kutusweek: Kaalyeet, kaalyeet eng' ineendet ne mi ole loo ak ineendet ne mi ole neegit ak asoop icheek.

²⁰ Ago uu kiptengeginik nyanjet ne wasegei; amu ma imuuchi komuuny, ak wiiru peekyik ng'atateek ak simdo.

²¹ Mwaei Kamuktaindennyu kole, ma mi kaalyeet eng' kiptengeginik.