ISAIAH 56 - BUKUIT NE TILIIL Sireet ne Dutero Kanon

Saruunet agobo alak

¹ Mwaei Kamuktaindet ne Toroor kole, osup kirwooget, ak oyai imanda: amu neegit konyo yetunennyu, ak neegit keng'aany imandanyu.

² Iberuurot ne yaei chuuto, ak weeriitap chii ne namei chuuto miising' ne riibei sabato ama imurwoni, ne riibei eunnyi si ma yai yaityet age tugul.

³ Amechamji toondet ne ki konamgei ak Kamuktaindet ne Toroor, kong'alaal kole, Itabaanena `Kamuktaindet ne Toroor piikyik: amechamji sirorto komwa kole, keero, aa keetit ne yaamaat.

⁴ Amu mwaei Kamuktaindet ne Toroor ko uu ni agobo sirorinik che riibei sabatosyekyuk, ak che leweni tuguuk che iboiboa, ak che namei miising' kayomisennyu:

⁵ kole, agoochini icheek kabwaatet ak kainet eng' koonnyu ak eng' irimoikyuk, kosiir weeriik ak tiibiik; agoochini kainet ne po koigeny, ne ma ki istoi.

⁶ Amutu kogeny toek che namegei ak Kamuktaindet ne Toroor, si koboisyechi ineendet ak kocham kainetap Kamuktaindet ne Toroor, koek otwogikyik, age tugul ne riibei sabato ne ma imurwoni, ak konamei miising' arorutyennyu;

⁷ amutu icheek kobwa tulweennyu ne tiliil, ak agoochi koboiboitu eng' koonnyu ne po saaet; kitaachei kagoochinoikwak che kibeelei ak tiseiywekwak, eng' kaptisisyennyu: amu kiguure koonnyu kootap saaet ne po pororyosyek tugul.

⁸ Mwaei Kiptaiyat Kamuktaindet ne Toroor ne iyumi che kigetimda che po Israel, kole, ta ayumjini alak ineendet, che siirei chechiik che ki kiyum.

⁹ Obwa, oamisye, okweek tyong'ik tugul che po timiin, ee, okweek tyong'ik tugul che po timiin.

¹⁰ Koryotin riibiikyik, ma tinyei tugul naet; icheeget tugul ko sesenik che namotin kuut, ma imuuchi icheek kokwer; irotitoi, ruitos, chamei konuukso.

¹¹ Ee, kipkein sesenik, ma piyong'dos agoi; ak chuuto ko mestoweek che ma iguitos kiy: ki komaasta tugul koosup ooreenywa, kigosup chii tugul keljinennyi, eng' komosta age tugul.

¹² Mwaei kole, obwa, si aip divaik, si kee maiyek konyiiech; ak kergeitu peetuuni ak mutai; peetuut ne oo, ne siirtoot.