ISAIAH 54 - BUKUIT NE TILIIL Sireet ne Dutero Kanon

Toroornatetap Zion

¹ Tyen, ee inyee ne ii soon, ne ma ii; tyen, ak iwaach, inyee ne ma inyooru ng'wanindo agobo sigisyet: amu chaang' lagogap ne mi ineegei kosiir lagogap osotyot, mwaei Kamuktaindet ne Toroor.

² Ibaraa ye mi emaing'ung', ak ingoiito icheek angoogap meng'otosyeguk; ameetee; igoit porooniguk, ak igimit tigongeniguk.

³ Amu inaktoi komostap eutap tai ak ne po kaataam; ak konyaban iyoteng'ung' pororyosyek, ak kogoochi kemeny kogeny nganasook che kiga kelakta.

⁴ Meiywei, amu melilani; anan itoptoben; amu ma kiteweerin, amu iutye teweernatetap ming'inateng'ung', ama ibwaati chotisyetap mosoknateng'ung'.

⁵ Amu Yaindeng'ung' ko manong'otyondeng'ung'; Kamuktaindet ne Toroor ne po lugoosyek kainennyi ak Ineendet ne Tiliil ne po Israel ko katyagindeng'ung'. Kiguure ineendet Kamuktaindetap ng'wony komugul.

⁶ Amu kigoguurin Kamuktaindet ne Toroor ko uu osotyot ne kigebagaakta, ne ki kigoochi koaragen eng' muguleldanyi, osotyot neta ko ming'in, ye kagion, mwaei Kamuktaindeng'ung'.

⁷ Ki abagaakteen ne matya; ago ayumin eng' rireenet ne oo.

⁸ Ki aung'enen togeennyu ne matya eng' nereegek che ing'irtogei; ago ariirenen eng' talasyet ne po koigeny, mwaei Kamuktaindet ne Toroor katyagindeng'ung'.

⁹ Amu uu niito eng' anee peegap Noa: amu ko uu ye ki ayosye ale ma komarane emet peegap Noa kogeny, kayosye ko uu nooto ale ma nereekyinin kogeny, anan agerin kong'.

¹⁰ Amu istogei tuloonook ak kiutoi tuloonook che mengeechen; ago ma istoenengei talasyennyu, ama ki istoi kayomisennyu ne po kaalyeet, mwaei Kamuktaindet ne Toroor ne rireenen.

¹¹ Ee inyee ne kinyaliili, ne wiirtoi usoonet ne oo, ama kigaigain, keero, alumdoi koiguk eng' saleiywek che korooron, ak alume lumeiyweguk koik che kiguure sapire.

¹² Ak ateege irimoiguk koik che piriireen, ak ayae ormariichoguk koik che kiguure bareqet, ak ayae tabanweguk tugul koik che korooron.

¹³ Ak ineeti Kamuktaindet ne Toroor lagoguk tugul; ak koeet kaalyeetap lagoguk.

¹⁴ Ki kimiitin eng' imanda; ilooitu eng' nyalilda, amu meiyweisyei; ilooitu eng' kamuiset, amu mariikyinin.

¹⁵ Keero, ngot kong'eet chii pooryeet, koma punwa: ibuti age tugul ne ing'eetyinin pooryeet.

¹⁶ Keero, ki ayai kitang'indet ne kuutei maatap nesek, si kobiit karnet ne po poisyennyi, ak ki ayai ng'emindet si kong'emis.

¹⁷ Ma kiberuuri karnet age tugul ne kiyaei si kogirinden; ak igikyini ng'elyepta age tugul ne kirindoin eng' kirwooget. Niito poroteetap otwogigap Kamuktaindet ne Toroor, ak imandanywa ne punwa, mwaei Kamuktaindet ne Toroor.