ISAIAH 51 - BUKUIT NE TILIIL Sireet ne Dutero Kanon

Saruunet ne po koigeny agobo Zion

¹ Oepcha iit, okweek che osubi imanda, okweek che ocheeng'e Kamuktaindet ne Toroor: ogeer rwandet ne ki kimoong'unenok eng' waet, ak ogeer keriinget ne ki kibalunenok.

² Ogeer Abraham kwandang'wong', ak Sara ne kisichok: amu ki aguur ineendet ye kita komi ineegei, ak aberuur ineendet ak abaraa.

³ Amu kagogaigai Kamuktaindet ne Toroor Zion: kagogaigai komoswekyik tugul che kigemeto, ak ki koyai ong'atennyi koigei Eden, ak koyai surkwenennyi koigei mbareetap Kamuktaindet ne Toroor; kinyoorchin olooto poiboiyet ak kaagaasetapkei, kobooto kongoi ak tyenwogik che rurei komyee.

⁴ Ogasa, ee piikyuk; oepcha iit, ee, pororyennyu: amu mong'unena ng'atuutyet, ak ayai kirwoogennyu kotonon koek lapkeiyetap piik.

⁵ Neegit imandanyu, kamong' yetunennyu, ak korwookyi piik eunekyuk; igeno ngeguusyek, ak komang'u eunnyu.

⁶ Onyal kipsengwet, ak ogeer ng'wony: amu petos kipsengwet ko uu iyeto, ak ositu ng'wony ko uu ngoryeet, ak pegu ko uu nooto icheek che menyei olooto: ago punjin koigeny yetunennyu, ama kigeesu imandanyu.

⁷ Oepcha iit, okweek che ongen imanda, piik che mi ng'atuutyennyu mugulelwekwak: amoiywei chotisyetap piik, amoaragense amu churisyosyekwak.

⁸ Amu amei icheek kiptorotyot ko uu ngoryeet, ak koamei icheek kutyet ko uu koroorik: ago punjin koigeny imandanyu, ak kobunjiin ibinwek tugul yetunennyu.

⁹ Ng'eet, ng'eet, ilaach kimnateet, ee, eutap Kamuktaindet ne Toroor; ng'eet, ko uu peetuusyek che po keny, ibinwegap peetuusyek che po keny. Tos ma inyee ne kiitonaton Rahab, ne kiitoor maswetit?

¹⁰ Tos ma inyee ne ki iteeny nyanjet, peegap rireet ne oo; ne ki iyai rireetap nyanjet koek ooreet ne landoe icheek che ki kityaach?

¹¹ Ak koweegegei che po Kamuktaindet ne Toroor che ki kityaach, ak kobwa Zion kotyenonu; ak tebee metowekwak poiboiyetap koigeny: nyooru kaagaasetapkei ak poiboiyet, ak komwei arageneet ak tigenet.

¹² Anee, aneendet ne agoigook: ii ng'oo, kot iywei chiito ne meei, ak iywei weeriitap chii ne kiyaei koek suswot;

¹³ ak ki iutye Kamuktaindet ne Toroor Yaindeng'ung', ne kiito kipsengwet, ak kolumda lumeiywegap ng'wony; ak iyweisyei kotugul, peetuut komugul, amu koroomnatetap usiindet ye chobegei si kong'emis? Mi ano koroomnatetap usiindet?

¹⁴ Kityaachi eng' chokyinet luulenik che ki kimut; ama meei, ama wendi keriinget, ama rarchin amitwogik.

¹⁵ Amu aa Kamuktaindet ne Toroor Kamuktaindeng'ung', ne awase nyanjet, si komoror mildaetapkei ne po peek: kainennyi ko Kamuktaindet ne Toroor ne po lugoosyek.

¹⁶ Ak kiande ng'aleekyuk kuting'ung', ak ki atugenen urwetap eunnyu, si kobiit amin kipsengwet, ak alume lumeiywegap ng'wony, ak aleenji Zion, ii pororyennyu.

¹⁷ Ng'eet, ng'eet, tonon, ee Jerusalem, ne ki iee kigombetap nereegek che koroomen che po Kamuktaindet ne Toroor eng' eunnyi; ki iee eng' kigombet ne oo, icholool, kigombet ne yaei piik koterteeryot.

¹⁸ Ma mi ne indochin ineendet eng' weeriik tugul che ki sich; ama mi ne namoti ineendet euut eng' weeriik tugul che ki igui.

¹⁹ Kagobutyin tuguuchuuto aeng'u; ng'oo anyun ne riirchinin? Kubernateet ak ng'emisyet, ak rubeet kobooto rotwetap chok; agoigoitoin ano anyun?

²⁰ Kagotanuiso weeriiguk, ruitos eng' tabanwegap ortinwek tugul, ko uu kenyeleet ne mi mesteet; nyiitootiin icheek nereegek che koroomen che po Kamuktaindet ne Toroor, kereetap kong' ne po Kamuktaindeng'ung'.

²¹ Kas anyun ni inyee ne kinyaliili, ak ko pogitot, ago ma eng' divaik:

²² Mwaei Kiptaiyandeng'ung' Kamuktaindet ne Toroor, ak ko Kamuktaindeng'ung', ne ng'alaaldochin piikyik, kole, ogeero, kaaip eng' eung'ung' kigombet ne po terteryotet, nooto ko kigombet ne oo ne po nereegekyuk che koroomen. Ma iee agoi.

²³ Ak ande eutap icheeget che inyaliilin; che ki leenji saboondang'ung', “Ng'uruuge, si kobiit kesiirte: ak iite pateng'ung' koigei ng'wonyut, ak koigei ooreet, eng' icheek che siirtoi.”