ISAIAH 50 - BUKUIT NE TILIIL Sireet ne Dutero Kanon

Tengektap Israel

¹ Mwaei Kamuktaindet ne Toroor kole, mi ano parweetap pesyetap kamenng'ung', ne ki aoone ineendet? Anan ki aaldachok ng'oo ne yaacha? Ki kialdak amu yaitwogikwok, ak ki kioon kamenng'ung' amu pistaosyekwok.

² Kilya si ma piit chii ye ki anyoone? Kinga kuurse koma piit chii ne wolu? Tos kigonwagit eunnyu kot koma imuuch kotyach? Anan ma tinyei kamuget ne asaruunee? Keero, ateenyi nyanjet eng' kergong'yennyu, ayae ainoosyek koek surkwen: poldos njireenikwak, ak kobek eng' melelda, amu ma mi peek.

³ Alaakyini kipsengwet tuindo, ak atuge kuniok.

⁴ Ki koono Kiptaiyat Kamuktaindet ne Toroor ng'elyepta ne po icheeget che ki kineet, si kobiit anai ole agimiititoi eng' ng'aleek ineendet ne ng'etat: ing'eetisyei karonet age tugul, ing'eeta si kobiit agas ko uu che ki kineet.

⁵ Ki koyaat Kiptaiyat Kamuktaindet ne Toroor itinnyu, ak ki ma angelel, anan atuktoochi patai.

⁶ Ki agoochi kobir patennyu piriik, ak agoochi matang'wekyuk icheeget che kiitut suumeek: ma aung'e togeennyu teweernateet ak che sing'iljino.

⁷ Amu toreto Kiptaiyat Kamuktaindet ne Toroor; ma alilan anyun amu nooto: ki auuiit anyun togeennyu koigei rwandet ne uui, ak angen ale ma lilani.

⁸ Neegit ineendet ne iityina imanda; kibortosi ak ng'oo? Ngetononse tuwai: ng'oo punyondennyu? Ingonyo koriikyo.

⁹ Ogeero, toreto Kiptaiyat Kamuktaindet ne Toroor; ng'oo ne igiikyino? Ogeero, osegitu icheek tugul ko uu ngoryeet; amei kiptorotyot.

¹⁰ Ng'oo eng' okweek ne iywei Kamuktaindet ne Toroor, ne kase iit kutitap otwogindennyi? Ne wendote mesundeito, ama tinyei lapkeiyet, ingomang' kainetap Kamuktaindet ne Toroor ak kotiegei Kamuktaindennyi.

¹¹ Ogeero, okweek tugul che olaali maat, che ogermenegei kegenganik: obunote liplibenetap mang'wong', ak eng' kwenutap kegenganik che kaolaal. Onyooru niito kobunu eunnyu; oruitosi eng' arageneet.