ISAIAH 5 - BUKUIT NE TILIIL Sireet ne Dutero Kanon

Kalewenetap mbareetap sabibuk ne mayiei

¹ Ngatyenji chamanennyu tyendo ne po chamyet agobo mbareennyi ne po sabibuk: Ki tinyei chamanennyu mbareetap sabibuk eng' tulweet ne ming'in ne akwai miising'.

² Ki pal keriinget koyieme ak koisto koik eng' yooto, ak komiinji keetiik che korooron che po sabibuk, ak koteech teekseet ne kooi eng' kwenut, ak kobal kogeny ole kitue sabibuk eng' yooto. Kileen imuuchi koi sabibuk, ago ki ii sabibuk che po timiin.

³ Ara anyun, okweek che omenye Jerusalem, ak okweek piigap Judah, asaok ale orwookwo ak mbareennyu ne po sabibuk.

⁴ Nee ne kita ta keyaei ne siirei eng' mbareennyu ne po sabibuk, ne ma ayai? Amu nee anyun, ye kinga leen yiei sabibuk, koi sabibuk che yaacheen?

⁵ “Ak nguno anyun amwaiwok kiit ne aitoi mbareennyu ne po sabibuk. Aistoi ng'otwennyi, si keam. Abute irimennyi, si ketyech.

⁶ Ametoi keng'em, si ma kesabori ama kesemberi; ago piitos katook che rutei piich ak che toorei piich. Ang'ate kogeny poolik si mata korobonji.”

⁷ Mbareetap sabibuk ne po Kamuktaindet ne Toroor ne po lugoosyek ko kootap Israel, ak keetinnyi ne iboiboi ineendet ko piigap Judah. Ki igen kirwooget, ago ki keer tumdaetap korotiik; ki igen imanda, ago ki kas riirek.

⁸ Pwo eng' icheek che ituitos kooriik, ak kotesei mbareenik, kot koma komi poroindo, ak kemetok omeny okweegei eng' kwenutap emet!

⁹ Mwaei Kamuktaindet ne Toroor ne po lugoosyek, agase eng' itiikyuk kole: “Iman, kuberi kooriik che chaang', agot kooriik che eecheen che korooron, koma menyei chii.

¹⁰ Amu yiei ekaisyek tamanu che po mbareetap sabibuk, debeinik aeng', ak kooi kesweegap kiloinik pogol agenge, kiloinik taman.”

¹¹ Pwo eng' icheek che ng'eetos karon miising', kocheeng'at maiyek; che eeisei agoi kemoi kween, kot kobogityo miising'!

¹² Mi eng' igoorwekwak ketubet ak kibugandet, sugutit ne ming'in ak ndurerut, ak maiyek. Ago ma iiti icheek poisyetap Kamuktaindet ne Toroor anan kobwaat poisyonigap eunekyik.

¹³ Kigeluul anyun piikyuk, amu kibetyi naet. Piikwak che konyitotiin ko parei rubeet, ak tuiyennywa ko parei melelda.

¹⁴ Nooto anyun, ki kobarait ye mi che ki kobek, ak kigoseng'eng' ne ma aechin ak kiy; choorchingei olooto che teegisootin che po Jerusalem ak chaang'indonywa, ak kogeny choorchingei olooto etunatennywa kobooto ineendet ne igasegei eng' kwenunnywa.

¹⁵ Kinyeroti chiito ne nyeraat, ak kiming'ini chiito ne oo, ak ki abuchi konyegap icheeget che ieetegei.

¹⁶ Ago itoroorot Kamuktaindet ne Toroor ne po lugoosyek eng' kirwoogetap imanda, ak Kamuktaindet ne Tiliil koboortoigei kole itabaanat eng' imanda.

¹⁷ Yeityo koagetyo aaregap kechir ko uu eng' ole cham koagete, ak koam toek ole ki kometo che akwaen.

¹⁸ Pwo eng' icheek che ichuutune ng'oogisto poroonik che po puch, ak kochuutu tengekto ko uu eng' rogoetap chepkichutit,

¹⁹ che mwaei kole, “Ingochaakta ineendet, kochokyi poisyennyi, si kobiit kegeer. Ingorik konyo kirwoogetap Ineendet ne Tiliil ne po Israel, si kobiit kenai!”

²⁰ Pwo eng' icheek che kuure `yaityet myeeindo, ak koguure `myeeindo yaityet, che igeere `mesundeito lapkeiyet, ak kogeere `lapkeiyet mesundeito; che igeere `ng'wanindo anyinyindo, ak kogeere `anyinyindo ng'wanindo!

²¹ Pwo eng' icheek che indogei kole ki utaatiin, ak kogeerei koleen ng'ulaatiin!

²² Pwo eng' icheek che koroomen koee divaik, ak murenik che kiimeen che puruchi maiyek.

²³ Che iityin imanda kiptengekyot agobo asoya, ak korebe imanda chiito ne po iman!

²⁴ Nooto anyun, ko uu ye peelei liplibenetap maat mobeek, ak ko uu ye igeesu liplibenetap maat susweek che yamyotiin, ko uu nooto kergeitu tigitikwak ak nunateet, ak kotogosta taaptokwak ko uu temburyek; amu ki koeesyo ng'atuutigap Kamuktaindet ne Toroor ne po lugoosyek, ak kosas ng'olyootap Ineendet ne Tiliil ne po Israel.

²⁵ Ki nereekyi kot anyun `Kamuktaindet ne Toroor piikyik, ak ki iyogoito eunnyi kogirinda icheek, ak kobir, kibotanso tuloonook che mengeechen, ak ki ek muuswekwak pusagaryek eng' kwenutap ortinwek. Nganda uu nooto, koma istogei nereegekyik, ago ta kochuulat eunnyi kora.

²⁶ Ak konamji ineendet parak songolyet koboorchi pororyo ne loo, ak koititenji icheek kobwa eng' ole poochin ng'wony, ak kobwa korwou, kochogu.

²⁷ Ma piitu eng' icheek ne ng'etei anan ko ne ibuti; ama mi ne inuuchi anan ne ruei; ama kitustusi pireneet ne rategei, ama ng'etei tapsinietap kweonikwak.

²⁸ Ng'atiben kipchabonikwak, ak ko riigotin kwangokwak tugul; kirogendoi keelyegap paraisisyekwak koik che uueen, ak uu tirookwak kipchurchuryet.

²⁹ Uu porisenennywa ne po ng'etundo, porisendos ko uu parnotigap ng'etuunyik; porisendos ak konam chooto kagonam, ak komut kochamegei, ama piitu chii ne saru.

³⁰ Ak komororchi icheek eng' peetuunooto ko uu mororetap nyanjet. Ak ngo keer chii emet, ogeero, mi mesundeito ak pichiindo, ak koimenit lapkeiyet eng' polikyik.