ISAIAH 48 - BUKUIT NE TILIIL Sireet ne Dutero Kanon

Uindap mugulelwegap Israel

¹ Ogas ni anyun, okweek, ee kootap Jakobo, che kimwaitoenok kainetap Israel, che ki obiitune peegap Judah; che oyostosi eng' kainetap Kamuktaindet ne Toroor, ak omwae Kamuktaindetap Israel, ago ma eng' iman, anan ko eng' imanda.

² Amu mwaei kole ki po nganaseet ne tiliil, ak kotiegei Kamuktaindetap Israel: kainennyi ko Kamuktaindet ne Toroor ne po lugoosyek.

³ Ki amwaite tuguuk che po tai kobooch keny; ee, ki mang'une kutinnyu, ak ki abarte: ki ayai achokyi, ak ki isulda.

⁴ Amu ki anai ale uin met, po karnet kaating'ung', po sugunwet togeng'ung';

⁵ nooto anyun ki amwaun kobooch keny; ki asip aboorun ama isulda: si memwa ile, kiyaei kanamwennyu, ak king'atei kanamwennyu ne ki kiwai, ak kanamwennyu ne ki kitany, chooto che king'atei chuuto.

⁶ Ki igas niito; keer chuuto tugul o; ak okweek, ko tos momwaitoi? Kaaboorun tuguuk che leelach kobooch nguno, agot tuguuk che ung'ootiin, che tomo inai.

⁷ Kitau keyaei nguno, ma pooch keny; ak kitom igas agoi peetuuni; si memwa ile, Keero, ki angen.

⁸ Ee, kitom igas, ee kitom inai; ee kitom koyaatak iting'ung': amu ki angen ale iyae kaberberisyet ne oo, ak ki kiguurenen pistoindet kobooch imi moo.

⁹ Agoitoi nereegekyuk amu kainennyu, ak amuitoi agobo inyee amu kalasunennyu, si magesun.

¹⁰ Keero, kaatiliilin eng' maat, ago ma ko uu fedha; kaalewenin eng' maat ne oo ne po nyalilda.

¹¹ Ayae amu kainennyu, amu kainennyu; amu kimurwonindoi ano kainennyu? Amagoochini age toroornatennyu.

¹² Oepcha iit, ee Jakobo, ak Israel nenyu, ne ki aguur: aa ineendet; aa ne po tai, ak ko aa ne po let kogeny.

¹³ Ee, kilum eunnyu lumeiywotap ng'wony, ak kiito eunnyu ne po tai kipsengwet: ye aguur icheek, kotononso kibagenge.

¹⁴ Oyumgei, okweek tugul, si ogas; ng'oo eng' icheek ne ki komwaita tuguuchuuto? Kigocham Kamuktaindet ne Toroor ineendet: yaei eng' Babilon kiit ne chamei, ak kotebee eunnyi Kaldeik.

¹⁵ Anee, ee aneendet ne ki amwae; ee ki aguur ineendet: ki amutu, ak poorei ineendet eng' ooreennyi.

¹⁶ Oriikyo, ogas ni; tomo amwa kiy eng' ung'oot kobooch keny; ki ami kobooch agoi; kagoyookta anyun Kiptaiyat Kamuktaindet ne Toroor, ak Kabuusennyi.

¹⁷ Mwaei ko uu ni Kamuktaindet ne Toroor, katyagindeng'ung', Ineendet ne Tiliil ne po Israel: Aa Kamuktaindet ne Toroor Kamuktaindeng'ung', ne ineetin iboor, ne indoun eng' ooreet ne kanyool ibun.

¹⁸ Kita myee nda kigegas ng'atuutikyuk! Kita igeitu kalyeng'ung' aineet, ak koigei imandang'ung' peegap nyanjet che mildogei:

¹⁹ Kita tenitu ng'aniek iyoteng'ung', ak koigei lagoguk che kisiche, chaang'indap ng'aniek: ki ma kota ki istoi kainennyi anan keng'em eng' tainnyu.

²⁰ Omande eng' Babilon, omwei eng' Kaldea; obarte eng' cheetap tyendo, omwaite niito, omwa kogasak agoi ole pooch ng'wony: omwa ole, Kigotyach Kamuktaindet ne Toroor Jakobo otwogindennyi.

²¹ Ma am melelda icheek ye ki kimuti kobun ong'atosyek: ki igoochi peek korootune rwandet konaga icheek: ki pet rwandet kogeny, ak kitumgei peek.

²² Mwaei Kamuktaindet ne Toroor kole, ma mi kaalyeet eng' kiptengeginik.