ISAIAH 46 - BUKUIT NE TILIIL Sireet ne Dutero Kanon

Ole teerchindoi Kamuktaindet ak kanamonigap Babilon

¹ Abuksei Bel, ing'uruuksei Nebo; lae `tyong'ik ak `tuuga kanamonikwak: kagiyai koek mileet tuguuk che ki oiboti, ko uu lautyet eng' tyong'ik che ng'etyotiin.

² Ing'uruuksei ak ko abuksei tugul; amu ma imuuch kola lautyet, kiluulei icheeget.

³ Oepcha iit, ee kootap Jakobo, ak tugul che ng'etunotiin che po kootap Israel, che ki ageseni kobooch ko kagisich, che ki kigeseni kobooch komi moo:

⁴ Aa ineendet agoi osindo, ak agesenook agoi osich kalwalek: ki ayae, ak ageseni, ee ageseni, ak asaru.

⁵ Orogendoa ng'oo, ak oaechinena ng'oo, ak oyaniena ng'oo si kobiit kegergeitu?

⁶ Icheek che rong'u thahabu eng' lolet, ak kogere fedha ratilit, kosiirei kitang'indetap thahabu, ak koyae tuguuchooto kanamwet; ibutyin ng'wony icheek, ee, kutung'jin.

⁷ Ibe tigikyyet, laei, ak koteepto eng' oldanyi, ak kotonon; ma keisto eng' komostanyi: ee, riirchin age kioto, ama imuuch kowol, anan kosar ineendet eng' nyalildanyi.

⁸ Obwaat ni anyun, ak obartegei ole oo murenik: obwaatyige kogeny, ee okweek pistoichu.

⁹ Obwaat tuguuk che po tai che po keny; amu aa Kamuktaindet, ama mi age; aa Kamuktaindet, ama mi age ne kegerge;

¹⁰ ne iboortoi kegesunet kobooch taunet, ak koboortoi kobooch peetuusyek che po keny, tuguuk che tomo koyaogis; kole, tononi kirwoogennyu, ak ayae tugul che achame:

¹¹ aguure toriityon ne amei panyeek eng' kong'asiis, aguure kirwoogindennyu kobun emet ne loo; ee, kaamwa, ak ayae kosulda; ki achop, ak ayai.

¹² Oepcha iit, okweek che oo nyigoonen, che oo looen eng' imanda:

¹³ Aibu imandanyu koriik, malooitu, ama igaegei yetunennyu: ak ande Zion yetunet agobo Israel ne toroornatennyu.