ISAIAH 45 - BUKUIT NE TILIIL Sireet ne Dutero Kanon

Koboisyee `Kamuktaindet ne Toroor Cyrus

¹ Mwachin `Kamuktaindet ne Toroor Cyrus, nenyi ne iilaat, ne aname eunnyi ne po tai, koterteer pororyosyek eng' tainnyi, ak atyach suenutigap laitorinik; si ayaat kurgotik eng' tainnyi, ama kigerei ormariichok, komwaei kole;

² Andoenen, ak alitit komoswek che kunuuren: atonatoni kereiywegap sugunonik che po kurgotik, ak atil temeleiywek che po kariik:

³ ak agoonin konoraigap mesundeito, ak mogornatosyek che ung'ootiin che po komoswegap ung'oot, si kobiit inai ile aa Kamuktaindet ne Toroor ne ki aguurin eng' kaineng'ung', Kamuktaindetap Israel.

⁴ Ki aguurin eng' kaineng'ung' amu Jakobo otwogindennyu ak amu Israel nenyu ne ki alewen: kaataun kainet nganda tomo inaa.

⁵ Aa Kamuktaindet ne Toroor, ama mi age; ma mi Kamuktaindet age kobatena: agermenin, nganda tomo inaa:

⁶ si kobiit konai icheek kobooch ko kachor asiis, ak kobooch cherongo, kole ma mi age kobatena: aa Kamuktaindet ne Toroor, ama mi age.

⁷ Ayae lapkeiyet, ak ayae mesundeito; ayae kaalyeet, ak ayae yaityet; aa Kamuktaindet ne Toroor, ne yaei tuguuchuuto tugul.

⁸ Osau, okweek kipsengwet, ak ingorong' poolik imanda: ingoyaatak emet, si kobiit koip poolik yetunet, ak ingogoochi imanda kobiityo tugul; anee Kamuktaindet ne Toroor ne ki ayae nooto.

⁹ Pwo eng' ineendet ne poortos ak Yaindennyi! Rokyet eng' rokyonigap ng'wony! Tos mwachin meneet ineendet ne kimimii, koleenjin, Iyae nee? Anan tos mwaei poisyeng'ung' kole, ma tinyei ineendet eunek?

¹⁰ Pwo eng' ineendet ne leenjin kwandanyi, Iyie nee? Anan koteebe kwondo koleenji, amin moet agobo nee?

¹¹ Mwaei Kamuktaindet ne Toroor, Ineendet ne Tiliil ne po Israel, ak ko Yaindennyi, kole, teebena agobo tuguuk che pwoonei; ong'ata agobo weeriikyuk, ak agobo poisyetap eunekyuk.

¹² Ki ayae ng'wony, ak ki atau ayai chiito kotebee olooto: anee, ee, eunekyuk, che kiito kipsengwet, ak ki ang'at lugosyekwak tugul.

¹³ Ki ang'eet ineendet eng' imanda, ak alititi ortinwekyik tugul: ineendet ne teechei nganasennyu, ak kotyach piikyuk che ki kimut, ma eng' alet anan melekto, mwaei Kamuktaindet ne Toroor ne po lugoosyek.

¹⁴ Mwaei Kamuktaindet ne Toroor kole, nyonjinin poisyetap Misiri, kobooto tuguugap mung'areetap Kush, ak piigap Sabe, piik che kooen, ak punjinin; isubun; pwonjinin ko ratotiin; ak kobutyi keelyeguk, kosoomin, kole, Iman mi Kamuktaindet kobooten; ama mi age, ma mi Kamuktaindet age.

¹⁵ Iman, ii Kamuktaindet ne iunyegei, ee, Kamuktaindetap Israel, Yetindet.

¹⁶ Ililandos, ee, toptobendos icheek tugul; toitos tugul che yaei kanamonik.

¹⁷ Ago saru Kamuktaindet ne Toroor Israel eng' yetunet ne po koigeny: molilandosi anan otoptobense koigeny ak koigeny.

¹⁸ Amu mwaei Kamuktaindet ne Toroor ne ki toi koyai kipsengwet kole, Ineendet ko Kamuktaindet ne kimimii ng'wony ak koyai; ki igimit, ki ma yai koek puch, ki yai si kobiit kemeny: aa Kamuktaindet ne Toroor; ama mi age.

¹⁹ Tom ang'alaal eng' ung'oot, eng' komostap emet ne po mesundeito; ma aleenji iyoteetap Jakobo, Ocheeng'a puch; amwae anee Kamuktaindet ne Toroor imanda, amwae tuguuk che litit.

²⁰ Oyumgei obwa; oriigu tugul, okweek che ki ochilile pororyosyek: ma tinyei naet icheek che ibei keetitap kanamwennywa ne ki kiwai, ak kosaaei kamuktain ne ma imuuchi kosar.

²¹ Omwaite, obarte; ee, ingorwoch tugul: ng'oo ne ki iboor ng'olyoondoniito kobooch keny? Ng'oo ne ki mwaita kobooch keny? Tos ma anee Kamuktaindet ne Toroor? Ama mi Kamuktaindet age kobatena; Kamuktaindet ne po iman, ak ko yaindet; ma mi age kobatena.

²² Onyala, si kesorwok, okweek tabanwek tugul che po ng'wony: amu aa Kamuktaindet, ama mi age.

²³ Ki ayosyechigei, kagomang'une ng'olyoot kutinnyu eng' imanda, ama weechegei, ale, kutung'jino kutundo age tugul, iyastos ng'elyepta age tugul.

²⁴ Leenjino age, Mi eng' Kamuktaindet ne Toroor ineegei imanda ak kimnateet: pwaanjin `piik ineendet ak kolilaandos icheek tugul che ki nereekyi ineendet.

²⁵ Ki ityin imanda iyoteet tugul ne po Israel eng' Kamuktaindet ne Toroor, ak kolasunegei.