ISAIAH 43 - BUKUIT NE TILIIL Sireet ne Dutero Kanon

Kayomiset ne po weegunet ak riibetap Israel

¹ Ago mwaei anyun Kamuktaindet ne Toroor ne kiyain kole ee Jakobo, ak ineendet ne kimimiin, ee Israel: kole, meiywei, amu ki atyachin; ki aguurin eng' kaineng'ung', ii nenyu.

² Ami kobooten ye ibune peek che chaang'; ak ye ibune ainoosyek, koma imaluuchin; ye ibune maat, koma peelin; ama imelin liplibenetap maat.

³ Amu aa Kamuktaindet ne Toroor Kamuktaindeng'ung', Ineendet ne Tiliil ne po Israel, Yetindeng'ung'; kaagoite Misiri koek ne kityagenen, kobooto Kush ak Seba.

⁴ Amu koiegu eng' anee ne achame miising', ak ne kigonyiti, ak ki achamin; agoitoi anyun piik agobo inyee, ak agoite piik agobo sabeeng'ung'.

⁵ Meiywei; amu ami kobooten: amutu iyoteng'ung' eng' kong'asiis, ayumin inyoo eng' cherongo;

⁶ Amwachini murot kaataam, aleenjini, Koonu; ak amwachi murot tai aleenji, Ametuuch; omutu weeriikyuk kobun ole loo, ak omutu tiibiikyuk eng' ole poochin ng'wony;

⁷ age tugul ne kimwaitoe kainennyu, ineendet ne ki atau ayai agobo toroornatennyu; ki amimii; ee, ki ayai.

⁸ Omutu piik che koryotiin che tinyei koonyek, ak omutu piik che ming'otin che tinyei itiik.

⁹ Ingoyumgei pororyosyek tugul, ak ingoyumgei piik: ng'oo eng' icheek ne imuuchi komwa ng'olyoondoniito, ak koboorwech tuguuk che po tai? Ingomut paorinikwak, si kobiit kiityi imanda: anan ingogas, ak komwa kole, po iman.

¹⁰ Oo paorinikyuk, mwaei Kamuktaindet ne Toroor, ak otwogindennyu ne ki alewen; si kobiit onai ak oyana, ak oguiye ole aa ineendet; ma mi Kamuktaindet age ne kisip keyai eng' anee, ama kobiitu age eng' let.

¹¹ Anee, ee, aneendet, aa Kamuktaindet ne Toroor; ama mi yetindet age kobatena.

¹² Ki amwaite, ak ki asaru, ak ki abarte, ama mi kamuktain ne teer eng' kwenung'wong': oo paorinikyuk anyun, mwaei Kamuktaindet ne Toroor, ak aa Kamuktaindet.

¹³ Ee, aa ineendet kobooch agoi, ama mi age ne imuuchi korep eng' eunnyu: aboisyei, ak ng'oo ne imuuchi koger?

¹⁴ Mwaei Kamuktaindet ne Toroor, katyagindeng'wong', Ineendet ne Tiliil ne po Israel, ko uu ni, kole: Ki ayookte ng'olyoot kwo Babilon agobo okweek, ak achooru icheek tugul ko uu che mweoti, chooto po Kaldeik, eng' melisyek che poiboitune.

¹⁵ Aa Kamuktaindet ne Toroor, neng'wong' Ne Tiliil, Yaindetap Israel, Laitoryandeng'wong'.

¹⁶ Mwaei Kamuktaindet ne Toroor, ne yaei ooreet eng' nyanjet, ak ooreet eng' peek che kiimeen;

¹⁷ ne imoong'u chepkichutit ak paraisiit kobooto lugeet ak kimnateet; ruitos tugul ng'wony, ama ng'eetos kogeny; kagobetyo, kagimis ko uu kitambit:

¹⁸ Amat obwaat tuguuk che po tai, amat ogereerchi met tuguuk che po keny.

¹⁹ Ogeero, ayae kiit ne leel; piitu anyun nguno; tos monae? Ayae ooreet eng' surkwen, ak ainoosyek eng' surkwen.

²⁰ Konyita tyong'igap timiin, lelwek ak tyong'igap songolik: amu agoonu peek eng' surkwen, ak ainoosyek eng' surkwen, si anaga piikyuk, chechuuk che ki alewen:

²¹ piik che ki ayachigei, si kobiit kobarta kalasunennyu.

²² Ago ma iguura, ee Jakobo; ago ki ing'eet agobo anee, ee Israel.

²³ Ma igetwo aareguk koek kagoochinoiguk che kibeelei; ama igonyitena tiseiyweguk. Ma abirchin iotisye kagoochinoik, ama aimeneen tuguuk che nyamdut.

²⁴ Ma ialunena fedha tuguuk che uu mutweek che nyamdut, ama igoono abiyo eng' mwanigap tiseiyweguk: ago ki imena tengekwogiguk, ki igoono ang'et agobo yaitwogiguk.

²⁵ Anee, ee aneendet ne aistoi pistaosyeguk, amu kainennyu; amabwaati tengekwogiguk.

²⁶ Ibwaatwa; ngeng'alaal tuwai: tetu ng'aleeguk, si kobiit kiityin imanda.

²⁷ Ki yai tengekto kwandang'ung' ne po tai, ak ki ingelelja ng'alaaliguk.

²⁸ Amurwoni anyun pounik che po ole-tiliil, ak ayae Jakobo koek ne chuboot, ak ayae Israel koek ne kisasei.