ISAIAH 42 - BUKUIT NE TILIIL Sireet ne Dutero Kanon

Kiboityotap Kamuktaindet ne Toroor

¹ Ogeero otwogindennyu, ne agimiiti, nenyu ne ki alewen ne poiboitune saboondanyu; kande ineendet saboondanyu; ipchin kirwoogetap iman pororyosyek.

² Mabolei anan kowaach, anan kotwek kot kegas kutinnyi eng' ooreet.

³ Ma iriei tegat ne chisot, ama imisi ineendet kitambit ne iyeni: ibu kirwooget eng' iman.

⁴ Matanui ama nyogoritu, agoi konde ng'wony kirwooget; ak kogen `ngeguusyek ng'atuutyennyi.

⁵ Mwaei ko uu nooto Kamuktaindet, Kamuktaindet ne Toroor, ne ki toi koyai kipsengwet ak koiito; ineendet ne kiito ng'wonyuni, ak che mang'une olooto; ineendet ne igoochin kabuuset piik che menyei ng'wony, ak kogoochi `kabuuset icheek che pendote.

⁶ Ki aguurin, anee Kamuktaindet ne Toroor eng' imanda, ak anam eung'ung' ak ariibin, ak agoonin iegu arorutyetap piik, iegu lapkeiyetap Pororyosyek;

⁷ iyat koonyek che koryotiin, imoong'u kimonjororinik eng' korgoreet, imoong'u che tebee mesundeito.

⁸ Aa Kamuktaindet ne Toroor, kainennyu nooto; amagoochini toroornatennyu chiito age, amagoochini kanamonik che kiwaei, kalasunennyu.

⁹ Ogeero, kagosulda tuguuk che po tai, ak amwaitoi tuguuk che leelach, amwaiwok kotomo kobiit.

¹⁰ Otyenji Kamuktaindet ne Toroor tyendo ne leel, otyen kalasunennyi kobooch tabandap ng'wony; okweek che ochoortoige nyanjet ak tugul che mi oriit, ngeguusyek ak piik che menyei olooto.

¹¹ Ingotyenso surkwen ak nganasookyik, nganasook che mengeechen che menyei Kedar, ingotyenso piik che menyei Shelah, ingowaach eng' tuloonook parak.

¹² Ingogoochi Kamuktaindet ne Toroor toroornatet, ak komwaita kalasunennyi eng' ngeguusyek.

¹³ Mandoi Kamuktaindet ne Toroor ko uu chiito ne kiim; ing'eeti nereegek ko uu chiitap lugeet; polei, ee waachei miising'; iboorchin puunikyik kamugennyi.

¹⁴ Ki asiis keny; kimayai kiy, ak aratkei: awaache anyun nguno ko uu kwondo ne machei kosigiis; asiiru ak asyenyi.

¹⁵ Ang'eme tuloonook ak tuloonook che mengeechen, ak ayaam sogekwak tugul; ak awal ainoosyek koek ngeguusyek, ak ateeny tamboinik.

¹⁶ Ak amutune kipkoratinik ooreet ne ma naei; andochini eng' ortinwek che ma naei: awale mesundeito koek lapkeiyet eng' tainnywa, ak alitit komoswek che kunuuren. Ayae tuguuchuuto, amabagaaktoi.

¹⁷ Kiweektoi icheek koba let, ak kolilaanso miising', che imang'u kanamonik che ki kiwai, che leenjin kanamonik che ki kitany, Oo kamuktaikyok.

¹⁸ Ogas okweek che oo ming'otin; ak ogosu, okweek kipkoratinik, si kobiit ogeerte.

¹⁹ Ng'oo ne koraat, kobatee otwogindennyu? Anan ng'oo ne miing'at ko uu kayooktoinnyu ne ayooktoi? Ng'oo ne koraat ko uu ineendet ne kiting'egei kaalyeet, ak ko koraat ko uu otwogindetap Kamuktaindet ne Toroor?

²⁰ Igeere tuguuk che chaang', ago meguitosi; yaatatin itiikyik, ago ma kasei.

²¹ Ki ibaibai Kamuktaindet ne Toroor, kotoroor ng'atuutyet, ak koyai koek ne kigonyiti amu imandanyi.

²² Ago chu ko piik che ki kiluul, ak kerebe tuguukwak; ki kiname icheek tugul keriingonik, ak keung'e korgorosyek: ki koek che kiluulei, ama mi chii ne saru; ki koek che kiluule tuguuk, ama mi chii ne leen, Oweekte.

²³ Ng'oo eng' okweek ne chamei koepchi iit niito? Ne chamei koep iit ak kogas agobo peetuusyek che pwoonei?

²⁴ Ki igoito ng'oo Jakobo keluul, ak ki igoito ng'oo Israel kogoochi rebiik? Tos ma Kamuktaindet ne Toroor? Ineendet ne ki kiyachi acheek tengekto, ak ne ki ma cham icheek kobendatee ortinwekyik, ama kas iit ng'atuutyennyi.

²⁵ Kiroong'ji anyun nereegekyik che koroomen, ak kimnateetap lugeet; ak koyieme maat ineendet, ago ma nai kora ak kobeel ineendet, ago ma chut muguleldanyi.