ISAIAH 41 - BUKUIT NE TILIIL Sireet ne Dutero Kanon

Toretindetap Israel

¹ Osisye eng' tainnyu, ee ngeguusyek; ingonyoor pororyosyek kimnateennywa ne leel: ingorik; yeityo kong'alaalso: ongeriigu tugul ye mi kirwooget.

² Ng'oo ne ki ing'eet ineendet ne punu kong'asiis, ne kuurei eng' imanda konyo keelyekyik? Igoitoi pororyosyek eng' tainnyi, ak kogoochi ineendet koboi laitorinik; igoochin icheek koigei temburyek eng' rotwennyi po chok, ko uu meteteek che arureni, eng' taitap kwangennyi.

³ Oone, ak kosiirto eng' kaalyeet; agot eng' ooreet ne kitom kobunei.

⁴ Ng'oo ne ki kobois ak kogees, ne kuurei ibinwek kobooch taunet? Anee Kamuktaindet ne Toroor ne po tai, ak ne po let, aa ineendet.

⁵ Ki keer ngeguusyek, ak koywei; kibotanso komoswek tugul che po ng'wony: ki riik, kobwa.

⁶ Kitoret age tugul chiitap kokwennyi, ak koleenji tugul ng'eetap kamet, Nyiganitu.

⁷ Kogiil anyun musogindetap pagoinik kitang'indetap thahabu, ak ineendet ne ichabaisye kiriswet ko ki ili ineendet ne pirei karnet ne oo, komwachin agobo ole kituiye ngosyelait, koleenjin, Myee: yeityo ko ki ige kipchumarisyek, si ma king'ei.

⁸ Ago inyee Israel, otwogindennyu, Jakobo ne ki alewen, iyoteetap chorwennyu Abraham;

⁹ inyee ne ki anamin kobooch ole poochin ng'wony, ak aguurin imang'une luukwekyik, ak aleenjin, ii otwogindennyu, ki alewenin ama atimdoin;

¹⁰ ameiyweisye, amu ami kobooten; amearagen, amu aa Kamuktaindeng'ung': agimiitin; ee, atoretiin; ee, anamin eng' eunnyu ne po tai ne po imandanyu.

¹¹ Keero, ililandos tugul che nereekyinin ak kotoptobenso: egu puch ak kobetyo.

¹² Icheeng'e icheek, amenyooru, agot icheek che obaregei: egu puch che poryenen, ak kogergeit ak kiy puch.

¹³ Amu aname eung'ung' ne po tai, anee Kamuktaindet ne Toroor Kamuktaindeng'ung', aleenjinin, Meiywei; atoretiin.

¹⁴ Meiywei, inyee Jakobo, ne ii kutyet, ak okweek piigap Israel; atoretiin, mwaei Kamuktaindet ne Toroor, ak katyagindeng'ung' ko Ineendet ne Tiliil ne po Israel.

¹⁵ Keero, ayain iegu kiit ne leel ne ng'atip ne kiboorsee, ne tinyei kelek: ibore tuloonook, ak itui komengegitu, ak iyai tuloonook che mengech kogergeit ak meteteek.

¹⁶ Iruri, si koip usoonet, ak koyesta kipchurchuryet: ak ibaibaitu eng' Kamuktaindet ne Toroor, ilasunegei Ineendet ne Tiliil ne po Israel.

¹⁷ Cheeng'ei peek piik che ponoon ak che ma tinyei kiy, ago ma mi, ak koyaamei ng'elyepta amu melelda; awoljini, anee Kamuktaindet ne Toroor, ma metoi anee Kamuktaindetap Israel.

¹⁸ Ayaate ainoosyek eng' komoswek che torooreen ole churat, ak ayaat kondametusyegap peek eng' kwenutap atebwosyek: ayae surkwen koek tamboiyot, ak emet ne yaamaat kobiitune kong'igap peek.

¹⁹ Amiine eng' surkwen taragonik, keetiigap chebitoik, momonik, ak che po mwanik; ak ande surkwen piribirinik, taragonik che sabuleen, ak taragonik che teer kobiityo tugul.

²⁰ Si komuuch kogeer, ak konai, ak kobwaat, ak koguiyo kibagenge, kole ki yai eutap Kamuktaindet ne Toroor niito, ak ki toi koyai niito Ineendet ne Tiliil ne po Israel.

²¹ Kale Kamuktaindet ne Toroor, Omwa ng'aleekwok; kale Laitoryatap Jakobo, Oibu ng'aleekwok che kiimeen.

²² Ingoip icheek, ak komwaiwech kiit ne piitu: omwa tuguuk che po tai, kiit ne uu, si kobiit kibwaat, ak kenai kagesunennywa, anan oboorwech tuguuk che tuun pwoonei.

²³ Omwa tuguuk che ta kobiitu, si kobiit kenai keele oo kamuktaik: ee, oyai ne myee, anan oyai ne ya, si kobiit ketoptobense, ak kegeer acheek tugul.

²⁴ Ogeero, oo po puch, ak poisyeng'wong' ko po puch: kiwechei ineendet ne lewenok.

²⁵ Koang'eet age ne punu murot kaataam, ak kagoit; punu ineendet ne kuure kainennyu ole chorunei asiista: ak nyoonjin pounik ko uu ye nyoonjin meneet, ak ko uu cheptereniot ne tyechei meneet.

²⁶ Ng'oo ne ki komwa ng'olyoondoni kobooch taunet, si kobiit kenai? Ak ne kisip komwa, si kobiit kemwa keele, Po ineendet imanda? Ee, ma mi agot agenge ne mwaei, ee, ma mi agot agenge ne ibooru, ee, ma mi agot agenge ne kasei ng'aleekwok.

²⁷ Amwachini korook Zion, aleenjini, Keero, keer icheek o; ak agoochini Jerusalem ineendet ne ibu logoiywek che myach.

²⁸ Ak ye ageer, koma mi chii; ma mi kirwoogindet agot eng' kwenunnywa, ne ye ateebee icheek, komuuchi kowol ng'olyoo.

²⁹ Ogeer tugul o, tangoita poisyonikwak ak ko puch: usoonet ak toiyet kanamonikwak che kitanyi.