ISAIAH 38 - BUKUIT NE TILIIL Sireet ne Dutero Kanon

Myandap Hezekiah

¹ Kimyan Hezekiah eng' peetuusyechooto kot ko neegit kome. Ak ki nyo ole mi ineendet Isaiah maotyot weeriitap Amos, ak koleenji ineendet, “Mwaei Kamuktaindet ne Toroor kole, rarchi keet piigap koong'ung'; amu imee, mesabe.”

² Kowelel anyun Hezekiah togeennyi kogeer inaat, ak kosa Kamuktaindet ne Toroor,

³ kole, ee Kamuktaindet ne Toroor, asaain ale, ibwaat ole ki atepte eng' imanda eng' taing'ung' ak eng' muguleldo ne ititaat, ak ki ayai ne myee eng' taing'ung'. Ak ki riir Hezekiah eng' ng'wanindo.

⁴ Konyonji anyun `ng'olyootap Kamuktaindet ne Toroor Isaiah koleenji,

⁵ “Ui mwachi Hezekiah ileenji, mwaei Kamuktaindet ne Toroor, Kamuktaindetap Daudi kwandang'ung' kole, kaagas saaeng'ung', kaageer peeguk po kong': keero, atesyini peetuusyeguk kenyiisyek taman ak muut.

⁶ Ak asaruun kobooto nganasani eng' eunegap laitoryatap Assyria: ak ariibe nganasani.

⁷ Ak egu ni kaboorunet eng' inyee ne punu Kamuktaindet ne Toroor, keele yaei Kamuktaindet ne Toroor kii kagomwa:

⁸ Keero, aweechi urwet ne po tilutik ne kagorekta kobooto asiista eng' kiit ne kirogendoe saisyek, ne po Ahaz, koweek kwo let tilutik taman. Kotogos anyun asiista tilutik taman eng' kioto kirogendoisye ne kagagorektae.”

⁹ Chu ng'aleek che kisir Hezekiah laitoryatap Judah, ye kiga komyan kot kosap eng' myandanyi.

¹⁰ Ki amwa ale, eng' kwenutap peetuusyekyuk ko kanyool awo; achute kurgeetap kererit, eng' peetuusyekyuk che ng'etunotiin.

¹¹ Ki amwa ale, ma ageere Kamuktaindet ne Toroor, ineendet Kamuktaindet ne Toroor eng' emetap piik che saptos. Ma ageere chiito kogeny kobooto che menyei ng'wony.

¹² Kageisto meng'ootennyu, kageibena ko uu emait ne po mestowot. Ki amaman saboondanyu ko uu ye mamanisyei chiito ne nabisyei; istoa eng' keetit ne kinabisye; iigeswa kobooch peet agoi kemoi.

¹³ Ki asiis kot koeech; iirye kawekyuk tugul ko uu ng'etundo; iigeswa kobooch peet agoi kemoi.

¹⁴ Ki atwegu anyun ko uu kibiswet anan cheptalamyat, ki ariir ko uu cheptuget. Ki anyal parak kot koimenitu konyekyuk; ee Kamuktaindet ne Toroor, anyalili, egu ne riiba.

¹⁵ Amwae nee anyun? Ki ng'alaalwo, ak ki koyai ineendet kosulda: Ki kobetena rwoon amu ng'wanindap saboondanyu.

¹⁶ Ee Kiptaiyat, saptos piik eng' tuguuchuuto, ak miitei saboondap saboondanyu tuguuchooto tugul. Inyaa anyun, ak igoono asap.

¹⁷ Keero, ki anyooru ng'wanindo ne oo agobo kalyennyu; ago ki isaru saboondanyu komang'une keriingetap ng'emisyet, amu ki iwiirte tengekwogikyuk koba let.

¹⁸ Amu ma imuuchi kererit kolasun, ma imuuchi meet kobwaatin. Ma imuuchi komong' imandang'ung' icheeget che choorchingei keriinget.

¹⁹ Ilasun che saptos, ee che saptos, ko uu ye alasun ra. Iboorchin `kwanisyek lagok imandang'ung'.

²⁰ Choboot Kamuktaindet ne Toroor kosarwo, kityeni anyun tyenwogikyuk eng' kibugandinigap inoik eng' peetuusyek tugul che po sabeennyo eng' kootap Kamuktaindet ne Toroor.

²¹ Kiga komwa Isaiah kole, “Ingoip logoegap mogoonik che inurotin, ak konuge ole mi ondiryet, si kosap.”

²² Kiga mwa Hezekiah kole, “Nee kaboorunet ne iboorwo kole atogostoi kootap Kamuktaindet ne Toroor?”