ISAIAH 32 - BUKUIT NE TILIIL Sireet ne Dutero Kanon

Pounateet ne po imanda

¹ Ogeero, laitorani laitoryat eng' imanda, ak kobounis pounik eng' kirwooget.

² Egu chiito ole kiung'egei eng' usoonet, ak eng' usoonet ne oo; ko uu ainoosyegap peek eng' ole yaamaat, ko uu urwetap rwandet ne oo eng' emetap ng'etatet.

³ Ama kigerei konyegap icheeget che keertoi, ak kogasta itigap icheeget che kastoi.

⁴ Ak koguiyo naet ak icheek mugulelwegap icheeget che sartaisyei, ak kong'alaalso komyee ng'elyebwegap che uueen kutusweek.

⁵ Ma keguure kogeny chiito ne perber ne tagunoot, anan keguure rebindet ne aiyeep.

⁶ Amu ng'alaali ne perber kaberberisyet, ak koyai muguleldanyi tengekto, kochombilis, komwa ne ya agobo Kamuktaindet ne Toroor, kometo puch saboondo ne amei rubeet, ak koete koee ne amei melel.

⁷ Yaacheen tuguuk che po rebindet; chobei chobutik che yaacheen si kobare che talaen ng'aleek che po lembech, agot ye ng'alaali ne ma tinyei kiy ng'aleek che lititen.

⁸ Ago chobei ne tagunoot tuguuk che taagunotiin; ak tebyei eng' tuguuk che taagunotiin.

Kateunet ne kiteechin kwonyiik

⁹ Ong'eetyee okweek kwonyiik che omuunyi, ogas kutinnyu; oepchi iit ng'aleekyuk okweek tiibiik che moriibegei.

¹⁰ Amu kinyalilok eng' peetuusyek alak ko kagosiirto kenyiit, okweek kwonyiik che moriibegei; amu petei ruroteetap sabibuk, ma piitu kesisyet.

¹¹ Obotanse okweek kwonyiik che omuunyi; onyalilye, okweek che moriibegei; oreegu ngoroik, ak otebi aach ngor, ak ogermenegei kuniok.

¹² Luchei tegetik koriirchin mbareenik che korooron, koriirchin keetiigap sabibuk che rurtos kot.

¹³ Piitos katook che toorei piich ak che rutei piich eng' emetap piikyuk; ee, eng' kooriik tugul che po poiboiyet eng' nganaseet ne paibai.

¹⁴ Amu kibagaaktoi kootap laitoryat; kiue nganaseet ne mi piik che chaang'; tulweet ak teekseet ne kooi ne kitabendoe, ko egu kebenonik koigeny ole poiboitune sigirok che po timiin, koek ole agete keechiirek;

¹⁵ agoi keroong'wech Kabuuset ne Tiliil eng' parak, ak koek surkwen mbareet ne rurei, ak kiroge mbareet ne rurei, timiin.

¹⁶ Tebee anyun kirwooget surkwen, ak kotebee imanda mbareet ne rurei.

¹⁷ Ak koek poisyetap imanda kaalyeet; ak kobiitune imanda kamuung'et ak kamang'unet koigeny.

¹⁸ Ak kotebee piikyuk meng'ootetap kaalyeet, eng' meng'otosyek che riibootin, ak eng' komoswek che kimuung'e ole siisaat.

¹⁹ Ago roboni koigap ropta kot koluul timiin; ak koluul nganaseet tugul.

²⁰ Oberuurotin okweek che ogoole tabanwegap peek komugul, che iyooktoi keelyegap eito ak che po sigiryet.