ISAIAH 27 - BUKUIT NE TILIIL Sireet ne Dutero Kanon

Yetunetap Israel

¹ Tuun pirei Kamuktaindet ne Toroor eng' peetuunooto eng' rotwennyi ne po chok ne koroom ak ko oo ak kogim, tyondo ne po peek ne uu ting'ong'et, ne ereneet ne chepchep, ak tyonyooto ne ereneet ne taategei; ak kobar maswetit ne mi nyanjet.

² Eng' peetuunooto, “Otyenji anyun mbareetap sabibuk ne po divaik.

³ Anee Kamuktaindet ne Toroor ne ariibe; abisi kotugul, ariibe kemoi ak peet si ma ng'em chii.

⁴ Ma tinyei nereegek che ng'woneen. Kata myee nda koboryena katook che rutei piich ak che toorei piich! Ta katyegoti icheek, ta kabeele tugul.

⁵ Anan konam ineendet kimnateennyu, si koyai kaalyeet kobooto; ee, ingoyai ineendet kaalyeet kobooto.”

⁶ Kimitu Jakobo eng' peetuusyek che pwoonei; piitei Israel ak kong'at, ak konyiit ng'wony logoek.

⁷ Tos kabir ineendet ko uu ye kibir `icheek ineendet? Anan kagibar ineendet ko uu parisyetap icheek che ki par ineendet?

⁸ Ki oborye ak ineendet ne yamei, ye ki ioone; ki isto ineendet eng' usoonennyi ne ng'waan eng' peetuutap usoonetap kong'asiis.

⁹ Tuun kiuundoi anyun eng' niito yaityetap Jakobo, ak chuuto ko logoek tugul che ki istoe tengektanyi; ye kagoyai koik tugul che po kaptisisyet kogergeit ak taartaarik che ki kitui, kot koma kong'eetos kogeny keetiik che po ole kisaae ak itoonwegap asiista.

¹⁰ Amu mi ineegei nganaseet ne ng'ootaat, meng'ooteet ne kigeue ak kemeto, ne uu surkwen; agete yooto moita, ak koru yooto, ak koam mooriikyik.

¹¹ Ye kagoresyo mooriikyik, koilyo; pwoonei kwonyiik ak kobeel. Amu pororyot ne ma tinyei kaguiyet; nooto anyun ma riiree icheek `ineendet ne kiyai, ama tiytiy icheek `ineendet ne kimimii.

¹² Tuun pirei Kamuktaindet ne Toroor eng' peetuunooto logoekyik korara, kobooch nyiietap Aineetap Yufrets agoi kererutap Misiri, ak kiyumak agenge agenge, ee okweek lagogap Israel.

¹³ Ak tuun kiguutei iryageet ne oo eng' peetuunooto; icheek che kinegit kolusyo eng' emetap Assyria kobooto che kigetimda eng' emetap Misiri ko tuun pwoonei kolas Kamuktaindet ne Toroor eng' tulweet ne tiliil eng' Jerusalem.