ISAIAH 26 - BUKUIT NE TILIIL Sireet ne Dutero Kanon

Tyendap Kalasunet kobun Judah

¹ Tuun kityeni tyeni eng' emetap Judah eng' peetuunooto: Ki tinyei acheek nganaseet ne kiim; ng'atei ineendet yetunet koek inatusyek ak irimoik.

² Oyat ormariichok, si kobiit kobun kwo oriit pororyet ne po iman, ne riibei imanit.

³ Iriibe ineendet kotebee kaalyeet ne ititaat, ineendet ne tienengei kabwautuikyik, amu imang'un.

⁴ Omang'u Kamuktaindet ne Toroor koigeny, amu mi eng' Kamuktaindet ne Toroor rwandet ne po koigeny.

⁵ Amu kigochoor ineendet icheek che menyei ole toroor, kigochoor nganaseet ne toroor. Iluuli ineendet nganaseet; iluuli agoi temburyek ng'ung'unyek.

⁶ Kityechei; tyechei kibananiat, ak ne ma tinyei kiy.

⁷ Litit ooreetap ineendet ne po iman; inyee ne ii litit, indochini ortinwegap chiito ne po iman.

⁸ Eng' ooreetap kirwoogutiguk; Ee, Kamuktaindet ne Toroor, ki kigenin, makyingei saboonwekyok kaineng'ung' ak kabwaateng'ung'.

⁹ Amachin eng' saboondanyu kemoi; acheeng'in eng' saboondanyu kotom koeech. Amu ye mi ng'wony kirwoogutiguk, koneetegei che menyei ng'wony imanda.

¹⁰ Agot nda kiboorchi chameet kiptengekyot, koma ineetigei imanda kora; yaei ineendet ne ma po iman eng' emetap imanda, ama keerei telunatetap Kamuktaindet ne Toroor.

¹¹ Kasutok eung'ung' Kamuktaindet ne Toroor, ama keerei icheek. Ago keerei kagiileng'ung' pogei agobo piik ak kolilaanso. Ee, laldos puuniguk.

¹² Inyee Kamuktaindet ne Toroor ne ing'atwech kaalyeet amu inyee ne ki iyaiywech kogeny poisyonikyok tugul.

¹³ Ee Kamuktaindet ne Toroor, Kamuktaindennyo, ki koboiywech kiptainik alak; ago acheek kemwae kaineng'ung' inyee, inyegei.

¹⁴ Ki kobek icheek, ma kosaptos; ki kobek, ma kong'eetos. Ki inyonji anyun ak ing'em icheek, ak ki igoochi kolus kabwaatet age tugul agobo icheek.

¹⁵ Ki ites pororyet, ee Kamuktaindet ne Toroor, ki ites pororyet kobarait; ii ne itoroorot; ki ites kobaraitu kiwotosyek tugul che po emet.

¹⁶ Ee Kamuktaindet ne Toroor, ki kobwonjin icheek eng' nyalilda, kisaain ye kiitigon icheek.

¹⁷ Ko uu kwondo ne tamono, ne kagoriik peetuusyek che chute ko, ye mi eng' ng'wanindo ak koriirei; ki kiuu nooto agacheek eng' taing'ung', ee Kamuktaindet ne Toroor.

¹⁸ Ki kimonogotin, ki kimi ng'wanindo, uu keele, ki kisich usoonet kityo; Tom keyai saruunet age tugul eng' ng'wony; ama ibutyo piigap ng'wony.

¹⁹ Tuun saptos cheguuk che ki kobek; ng'eetos muuswekyuk. Ong'eetyee ak otyen, okweek che omenye ng'ung'unyek! Amu uu rewondeng'ung' rewootap ingweek, ak koonu ng'wony che ki kobek.

²⁰ Obwa, piikyuk, mong'ji kooriguk oriit, ak ogerchigei ko. Ounyge ne matya, agoi kosiirto nereegek.

²¹ Amu mong'u Kamuktaindet ne Toroor eng' oldanyi si kobiit kobir che menyei ng'wony amu yaityennywa. Ng'aanyei ng'wony kogeny korotiikyik, ama kotuchei piikyik che ki kibar.