ISAIAH 25 - BUKUIT NE TILIIL Sireet ne Dutero Kanon

Tyendap Katorooret ne kibwaatee saruunet

¹ Ee, Kamuktaindet ne Toroor, ii Kamuktaindennyu; atoroorin, alasu kaineng'ung'; amu ki iyai tuguuk che kikwong'ee, kirwoogutik che po keny, eng' kagesunatetapkei ak eng' imanit.

² Amu ki iyai nganaseet koek karurugutyet; ki iyai nganaseet ne ng'ootaat koek karaatya. Ki iyai kootap laitoryat ne po toek koek ole ma mi nganaseet; ma koi ta keteech kogeny.

³ Konyitin anyun piik che kiimeen, iywein nganaseet ne po pororyosyek che imuisei.

⁴ Amu ki iegu irimeetap kibananiat, irimeetap ne ma tinyei kiy eng' pichiindanyi, ii ole kimwechin eng' usoonet ole kiuure eng' kiptoret. Ye igei usoonetap che imuisei, usoonet ne oo ne rusei inaat.

⁵ Iming'ini polatetap toek ko uu kiptoret eng' ole yaamaat; kinyeroti tyendap che imuisei ko uu kiptoret eng' tulugenet.

⁶ Eng' tulwooni ko tuun yachin Kamuktaindet ne Toroor ne po lugoosyek pororyosyek tugul, igoorto ne po tuguuk che akwaen ak divaik che ki kotebi keny, ne po tuguuk che akwaen che nyiitootiin mwanik, ne po divaik che korooron.

⁷ Tuun ng'emei ineendet eng' tulwooni kiit ne kituge piik tugul, ak angeet ne ki kituge pororyosyek tugul.

⁸ Ki kolugui ineendet meet koigeny. Tuun ibuchi Kiptaiyat Kamuktaindet ne Toroor peegap kong' eng' togoochik tugul; ak koisto teweernatetap piikyik eng' ng'wony komugul. Amu kagomwa Kamuktaindet ne Toroor niito.

⁹ Ak tuun kimwaei eng' peetuunooto keele, “Ogeero, niito ko Kamuktaindennyo; ki kigen ineendet, ak sarwech ineendet. Niito ko Kamuktaindet ne Toroor; ki kigen ineendet, kigasigei ak keboiboitu eng' yetunennyi.”

Kergong'yet ne ityin Moab

¹⁰ Amu imuunyi eutap Kamuktaindet ne Toroor eng' tulwooni, ak ketyekyi ng'wony Moab eng' oldanyi, ko uu ye kityekyin ng'wony mobeek eng' peegap kapng'atat.

¹¹ Agot ngo iitoochi eunekyik kwenunnywa, ko uu ye iitoi eunekyik ineendet ne pirei peek, kiming'ini menatennyi kobooto ng'aalsetap eunekyik.

¹² Ak kagobut ole ng'ootaat ne po teekseet ne kooi, ne po irimoiguk, kagoluul, kagowiirtagei kwo ng'wony, ole miitei temburyek.