ISAIAH 23 - BUKUIT NE TILIIL Sireet ne Dutero Kanon

Maonateet agobo Tyro

¹ Maonateet agobo Tyro. Oteiye okweek melisyegap Tarsis; amu kageng'em kot koma komi koot, anan ole kibunei kebendi oriit. Ki king'aang'ji icheek ng'olyoondoniito eng' emetap Kitim.

² Osisye, okweek che omenye ole po ngeguut; ne ki ibun tuguuk chemung'arainigap Sidon, che kilong'une nyanjet.

³ Keljinennyi ko ki iyoteetap Sihor ne ki punu peek che chaang', nooto ko kesisyetap aineet; ak ki ye mi ole keyae mung'aaret ne po pororyosyek.

⁴ Ililan, ee Sidon, amu kagong'alaal nyanjet, irimeetap nyanjet kole: “Tom anyooru ng'wanindo anan asigisye, tomo abai murenik anan pergeinik.”

⁵ Ye iit ng'aleek Misiri, konyooru icheek ng'wanindo ne oo miising' eng' ng'aleegap Tyro.

⁶ Olande Tarsis; oteiye, okweek che omenye ngeguut.

⁷ Tos nganaseng'wong' ni ne po poiboiyet, ne ki mi kobooch keny, ne ki imut keelyekyik kwo ole loo?

⁸ Ng'oo ne ki chop ng'olyoondoniito agobo Tyro, ne ilaakyin piik kutonook, che chemung'arainikyik ko pounik, che aldaikyik ko piik che konyitotiin che po ng'wony?

⁹ Ki kochop nooto Kamuktaindet ne Toroor ne po lugoosyek, si kobiit komurwon menoteet tugul ne po toroornatet, ak koteweer piik tugul che konyitotiin che po ng'wony.

¹⁰ Pun emeng'ung' ko uu aineet, ee cheptap Tarsis; ma itinye pireneet kogeny.

¹¹ Kigotokyi eunnyi nyanjet, ki kotumdum pounatosyegap laitorinik. Kigon Kamuktaindet ne Toroor ng'atuutyet agobo Kanaan, kole, keng'em irimoikyik.

¹² Ki le ma iboiboitu inyee, ee ne ii pergeiyat, cheptap Sidon ne kiusei! Ng'eet, lande, ui Kitim; ago menyooru kamuung'et agot eng' olooto.

¹³ Ogeero, emetap Kaldeik; ma komi pichooto; Ki kochopchi Assyrianindet emonooto tyong'igap surkwen. Ki teech teeksosyekwak che kooen, kibut kooriikyik che po laitorinik, Ki kong'em.

¹⁴ Oteiye, okweek melisyegap Tarsis; amu kigeng'em irimeng'wong' kigees.

¹⁵ Tuun kiutye Tyro kenyiisyek tamanwogik tisap eng' peetuusyechooto, ko uu peetuusyegap laitoryat agenge. Ago eng' kagesunetap kenyiisyek tamanwogik tisap, koigei Tyro kiit ne uu tyendap chepkugoniot:

¹⁶ “Nam ketubet, ak iwendote nganaseet, inyee chepkugoniot ne kigeutyenen! Tyen korur, tyen tyenwogik che chaang', si kibwaatin.”

¹⁷ Ak ye ibata kenyiisyek tamanwogik tisabu, koityi Kamuktaindet ne Toroor pireet Tyro, si koweek konyoor mung'arennyi, si koyai kugoinatennyi kobooto laitornatosyek tugul che po ng'wony eng' emet.

¹⁸ Ak koek mung'arennyi ak melektanyi tiliilindo eng' taitap Kamuktaindet ne Toroor: ma kigonori ama kibasei, amu punjin mung'arennyi icheek che menyei taitap Kamuktaindet ne Toroor, si koam kobiyong'so, ak kolaach ngoroik che po telunateet.