ISAIAH 22 - BUKUIT NE TILIIL Sireet ne Dutero Kanon

Kateunet agobo ng'emisyetap Jerusalem

¹ Maonateet agobo atebweetap ng'ang'utyet. Amin nee anyun, kot itogoste kooriik parak?

² Ee inyee ne nyiitaat polatosyegap piik, nganaseet ne nyiitaat wasetapkei ak nganaseet ne paibai! Ma kibare piiguk rotwetap chok, ama pegu eng' lugeet.

³ Kimwei kibagenge pouniguk, ki rat mwogik icheek. Ki kirat tugul che ki kinyoor eng' okweek, ki mweiso icheek kolooegitu.

⁴ Ki amwa anyun ale, welelgei amegeera, si ariir eng' ng'wanindo; matibirtegei ile igaigaa, amu luuleetap cheptap piikyuk.

⁵ Amu punu Kiptaiyat Kamuktaindet ne Toroor ne po lugoosyek peetuutap nyalilda ni, ne po tyeget ak ne po kaimetapkei eng' atebweetap ng'ang'utyet, peetuutap putetap irimoik, ak riirek che ki riirchin tuloonook.

⁶ Ki ip Elam motyet, kobooto kariisyek che po lugeet ak piik che ketei paraisisyek; ak ki ng'aany Kir long'eet.

⁷ Ki nyi atebwosyeguk che myach kariisyek che po lugeet, ak kitetkei piik che ki laanyei paraisisyek eng' ormariichet.

⁸ Ak ki isto ineendet kiit ne kituchei Judah. Ki igeer inyee eng' peetuunooto kariigap lugeet eng' koot ne mi timiin.

⁹ Ki ogeer ole chaang' ole ki kobutogis eng' nganaseetap Daudi, ak oyum peegap tamboiyot ne mi ng'wony.

¹⁰ Ak oiit kooriigap Jerusalem, ak obut kooriik si kobiit ogimiit irimeet.

¹¹ Ki obal keriingetap peek eng' kwenutap irimoik aeng', si korootyi peegap tamboiyot ne po keny. Ago ma ogeer ineendet ne kiyaei niito, amoiit ole kiy ineendet ne kiyaei niito keny.

¹² Eng' peetuunooto ko ki kuurso Kiptaiyat Kamuktaindet ne Toroor ne po lugoosyek, si kobiit oriirye ak oteiye, si ocheru metowek ak olaach kuniok.

¹³ Ak ogeero, poiboiyet ak kagasetapkei, eng'seetap keechiirek ak ne po tuuga, oame panyeek ak oee divaik. “Ongeamisye ak keeise, amu kibegu mutai.”

¹⁴ Ki ng'aang'jigei Kamuktaindet ne Toroor ne po lugoosyek itiikyuk koleen: “Ma kitiliilok iman eng' yaityoni kot obegu,” mwaei Kiptaiyat, Kamuktaindet ne po lugoosyek.

Kerebe Seba poisyennyi ak kieti Eliakim

¹⁵ Kamwa ko uu ni Kiptaiyat Kamuktaindet ne Toroor ne po lugoosyek, kole ui ole mi ne riibei tuguuk, kap Sebna, ne pou koot, ak ileenji:

¹⁶ Iyae nee eng' yu? Omi ak ng'oo yu, kot ibaljige kererit eng' olito? Ko uu ne paljingei kererit eng' ole po parak, ne paljingei ole menyei eng' rwandet!

¹⁷ Keero, wiirtoin Kamuktaindet ne Toroor eng' kimnateet ko uu chiito ne kiim; ee, taain miising'.

¹⁸ Weleljiningei iman ak kowiirten iwe parak ko uu tagurgurwet eng' emet ne paraa; imechini olooto, ak tebee olooto kariisyegap lugeet che po toroornateng'ung', inyeendet teweernatetap kootap kiptaiyandeng'ung'.

¹⁹ Aoonin eng' poisyeng'ung', ak kong'usun inyoo ng'wony.

²⁰ Ak aguur otwogindennyu Eliakim weeriitap Hilkiah eng' peetuunooto,

²¹ alaakyi ineendet ngoryeeng'ung', ak agimiite ineendet pireneng'ung' ak agoochi ineendet pounateng'ung'. Egu ineendet kwandap piik che menyei Jerusalem ak ne po kootap Judah.

²² Andoi tigikyennyi yaateiwotap kootap Daudi; ak yaatei ineendet, ama mi chii ne kerei; ak kerei ineendet, ama mi chii ne yaatei.

²³ Ak agiich ineendet ko uu kipchumaryat eng' ole kiim; ak koek ng'echereetap toroornatet eng' kootap kwandanyi.

²⁴ Ak kolaakyi icheek ineendet toroornatet tugul ne po kootap kwandanyi, iyoteet ak lagok, tereet age tugul ne ming'in, kobooch tuguugap kigombok agoi chuboinik tugul.

²⁵ Mwaei Kamuktaindet ne Toroor ne po lugoosyek kole, ki istoi eng' peetuunooto kipchumaryat ne ki kagigiich eng' ole kiim; ak keep, ak koluul, ak keisto nyigiisindo ne ki tinyei; amu kagomwa Kamuktaindet ne Toroor niito.