ISAIAH 2 - BUKUIT NE TILIIL Sireet ne Dutero Kanon

Zion Tulweetap Kamuktaindet ne Toroor.

¹ Ng'olyootap Isaiah weeriitap Amos, ne ki keer agobo Judah ak Jerusalem.

² Kimitu eng' peetuusyek che po let, tulweetap kootap Kamuktaindet ne Toroor eng' tuloonook parak, ak kitoroori kosiir tuloonook che mengeechen; ak tuun pwaanjin olooto pororyosyek tugul.

³ Tuun itendenjin olooto piik che chaang' koleen, “Obwa, keebe ketogoste tulweetap Kamuktaindet ne Toroor, agoi kootap Kamuktaindetap Jakobo; si koneetech ortinwekyik, si kebendatee ortinwekyik.” Amu mang'une ng'atuutik Zion, ak komang'une ng'olyootap Kamuktaindet ne Toroor Jerusalem.

⁴ Ak korwooksechin `ineendet pororyosyek, ak koger kong' piik che chaang'. Ak kotany rotonikwak po chok koek mogomboik che po tuuga, ak kotany ng'otwekwak koek chepkesok; si ma kobaregei pororyosyek, ama koneetegei lugeet kogeny.

⁵ Ee kootap Jakobo, obwa kebendatee lapkeiyetap Kamuktaindet ne Toroor.

⁶ Amu ki ibagaakte piiguk, kootap Jakobo, amu kigonyi icheek pitonwegap kong'asiis, ak ki koek icheek chepsogeinik ko uu Philistiik, ak konamgei eunek koyasyechigei ak lagogap toek.

⁷ Nyiitaat emennywa kogeny fedha ak thahabu, ama mi ole igeesunegei konoraikwak. Nyiitaat emennywa kogeny paraisisyek, ama mi ole igeesunegei kariisyekwak.

⁸ Nyiitaat emennywa kogeny kanamonik; ilasu poisyonigap eunekwak, che kiyaei eunekwak.

⁹ Ing'uruuksei chiito ne nyeraat, ak kiming'ini chiito ne oo, ko uu nooto anyun amenyochi kaat icheek.

¹⁰ Chut rwandet, ak iung'egei temburyek, imwee kamuisetap Kamuktaindet ne Toroor, ak eng' toroornatetap etunatennyi.

¹¹ Kinyeroti che ieetegei, ak kiming'ini menoteetap piik, Kamuktaindet ne Toroor ineegei ne tororitu eng' peetuunooto.

¹² Amu tuun piitu peetuutap Kamuktaindet ne Toroor ne po lugoosyek, eng' icheek tugul che mendos ak che ieetigei; ak eng' icheek tugul che itoroorigei, ak kiming'ini tugul;

¹³ eng' taragonik tugul che po Lebanon, che torooreen ak koeetigei, ak eng' keetiik tugul che po Bashan;

¹⁴ ak eng' tuloonook tugul che kooen, ak eng' tuloonook tugul che kitororitu;

¹⁵ ak eng' teekseet age tugul ne kooi, ak eng' irimeet age tugul ne ng'ootaat;

¹⁶ eng' melisyek tugul che po Tarsis, ak eng' itoonwek tugul che ki chamei.

¹⁷ Kiming'ini kaeetetapkei ne po chiito, ak kinyeroti menoteetap piik; Kamuktaindet ne Toroor ineegei ne tororitu peetuunooto.

¹⁸ Ak igeesugei kanamonik.

¹⁹ Ak komwechi piik kebenonik che mi rwandosyek, ak keriingonik che mi ng'wony, komwee kamuisetap Kamuktaindet ne Toroor, ak eng' toroornatetap etunatennyi, ye kang'eet kotumdum ng'wonyuni eng' kimnateet.

²⁰ Eng' peetuunooto ko laktoi chiito kanamonikyik che po fedha, kolaktoochi pung'ung'onik ak reresik ak kanamonikyik che po thahabu, che ki kiyachi ineendet si kosa,

²¹ si komwechi kebenonik, ak rwandosyek che kibetogis, komwee kamuisetap Kamuktaindet ne Toroor, ak eng' toroornatetap etunatennyi, ye kang'eet kotumdum ng'wonyuni eng' kimnateet.

²² Amomang'u chii, ne tinyei kabuuset. Amu tilei nee?