ISAIAH 19 - BUKUIT NE TILIIL Sireet ne Dutero Kanon

Kirwooget ne kirwookyine Misiri

¹ Maotenet agobo Misiri. Ogeero, laanyei Kamuktaindet ne Toroor pooldet ne chepchep, ak nyoonei agoi Misiri. Ak kiitumdumgei kanamonigap Misiri eng' tainnyi, ak kochoot muguleldap Misiri eng' kwenunnyi.

² Ak ang'eet Misiriik kobargei ak Misiriik, ak kobargei icheek, chii tugul ak tupchennyi, chii tugul ak chiitap kokwennyi, paregei nganaseet age ak age, ak kobargei laitornatet age ak age.

³ Ak tuun kiyaei koek puch kimnateet Misiri eng' kwenunnyi, ak ang'em kirwoogutikyik; ak koba kocheeng' kanamonik ak piik che abusisyei, ak che poisyee oik, ak pooniik.

⁴ Ak agoochi Misiriik kiptaiyat ne koroom koboi icheek; ak koboi icheek laitoryat ne koroom, mwaei Kiptaiyat, Kamuktaindet ne Toroor ne po lugoosyek.

⁵ Ak koteenyo peek eng' nyanjet, ak koteeny aineet ak koyaam.

⁶ Ak kobulyo ainoosyek, ak koteenyo ainoosyegap Misiri ak koyaamyo. Ak koresyo saosanik ak mutweek.

⁷ Ak koyaamyo morong'inik che mi aineetap aineet, che mi ngeguutap aineetap aineet, kobooto tugul che ki kimin eng' ole neegitee aineetap aineet, ak keip ak kobetyo ama kobiitu.

⁸ Tuun riirtos ramik che po njireenik, ak koteiyo icheek tugul che namei njireenik eng' aineetap aineet, ak kobetyi kimnateet icheek che wiirchin peek regereiywek che kiname njireenik.

⁹ Ililandos icheek che laei katanit ne karaaran, ak che taei ngoroik che leelach.

¹⁰ Ak koilyo tolochikyik kotonogis, ak koaragenso icheek tugul che ki kisir koyai poisyet.

¹¹ Perberen miising' pounigap Zoan; kaabusak kirwoogetap kirwoogik che utaatiin miising' che po Pharaoh. Omwachindoi ano Pharaoh, oleenji, “Aa weeriitap che ng'oomen, weeriitap laitorinik che po keny”?

¹² Mi ano anyun piiguk che ng'oomen? Ingomwaun nguno ak koyai konaak kiit ne kogochop Kamuktaindet ne Toroor ne po lugoosyek agobo Misiri.

¹³ Kagoek che perber pounigap Zoan, ki kiberber pounigap Nop; che ki koitap luuita ne po pororyosyekyik kogogoochi Misiri komasta.

¹⁴ Kigoburukyi `Kamuktaindet ne Toroor icheek muguleldap kamaaset eng' kwenunnyi; ak kogogoochi `icheek Misiri komasta eng' poisyennyi age tugul, ko uu ye terteryoti kibogityot kong'ung'u.

¹⁵ Ama komi poisyet age tugul agobo Misiri, ne imuuchi koyai metit anan katutyet, temetap sosyoot anan mutwot.

Ootei piigap Misiri Kamuktaindet ne Toroor

¹⁶ Eng' peetuunooto, ko kergeitu Misiri ak kwonyiik. Potani icheek ak koiyweisyei amu twaitwaetap eutap Kamuktaindet ne Toroor ne po lugoosyek, ne twaitwai eng' paragunnyi.

¹⁷ Ak koek emetap Judah kamuiset eng' Misiri, ak iyweisyei age tugul ne kemwachin agobo nooto, amu chobetap Kamuktaindet ne Toroor ne po lugoosyek, ne ki chop kogirinda emonooto.

¹⁸ Tuun piitu eng' peetuunooto nganasook muutu eng' emetap Misiri che ng'alaali kutitap Kanaanik, ak koyasyechi kobunji che po iman eng' Kamuktaindet ne Toroor ne po lugoosyek. Tuun kiguure age eng' chooto Nganaseetap ng'emisyet.

¹⁹ Tuun piitu eng' peetuunooto kaptisisyetap Kamuktaindet ne Toroor eng' kwenutap emetap Misiri, ak toloita ne po Kamuktaindet ne Toroor ne mi kiwotennyi.

²⁰ Tuun egu nooto kaboorunet ak paornateet ne po Kamuktaindet ne Toroor ne po lugoosyek eng' emetap Misiri. Tuun riirchin Kamuktaindet ne Toroor amu usiikwak, ak koyookyi icheek yetindet, kotoret, ak kosar icheek.

²¹ Ak konaak Kamuktaindet ne Toroor eng' Misiri, ak konai `Misiriik Kamuktaindet ne Toroor eng' peetuunooto. Ilasune icheek koroseek ak kagoochinoik, ak koarorchi Kamuktaindet ne Toroor kaarorunet, ak koyai kosulda.

²² Ak tuun pirei Kamuktaindet ne Toroor Misiri, kobir ak kosoop; ak koweekyigei Kamuktaindet ne Toroor, ak kogasyi soomutikwak ak kosoop icheek.

²³ Tuun piitu ooreet ne oo eng' peetuunooto ne ng'eetee Misiri agoi Assyria. Tuun pwoonei `piigap Assyria Misiri ak koba `Misiriik Assyria; ak kosa Misiriik kobooto piigap Assyria.

²⁴ Egu ne po somok Israel eng' peetuunooto, kobooto Misiri ak Assyria, koek kaberuret eng' ng'wony.

²⁵ Amu tuun iberuur Kamuktaindet ne Toroor ne po lugoosyek icheek, koleen, iberuurotin piikyuk Misiri ak Assyria poisyetap eunekyuk, ak Israel porotennyu.