ISAIAH 18 - BUKUIT NE TILIIL Sireet ne Dutero Kanon

¹ Pwo! Emet ne tinyei kebebaik che cheitos, ne mi pitoniin eng' ainoosyegap Kush;

² ne iyooktoi piik che tononjin kobun nyanjet, eng' tuguuk che ki kiyae mutweek kobun peek parak, koleenji, “Oba okweek piik che kiyooktoi che chepcheben, agoi pororyet ne kooen piik ak ko ng'orng'oren, piik che imuisei kobooch taunennywa agoi, pororyet ne ikwaisei ak kotyegoti, ne pcheei ainoosyek emennywa!

³ Okweek tugul che omenye ng'wony, ak okweek che omenye emet, ye kinamjin parak songolyet eng' tuloonook, ogeer! Ye kiguutei iryageet, oep iit!”

⁴ Amu kamwaiwo Kamuktaindet ne Toroor ko uu ni koleenjo: “Asise, ak ageere eng' ole amenye, ko uu asiista ne ng'waan ne iluu miising', ko uu poldetap rewoot eng' kiptoretap peetuusyegap kesisyet.”

⁵ Amu ye tomo kobiit kesisyet, ye kagobutyo taaptook, ak koek taaptook logoek che rurtos, kotile chepkeswet ole ing'atos, ak koep koisto mooriik che iwaktoi.

⁶ Kibagakyin icheek tugul toriitik che koroomen che po tuloonook, ak tyong'igap timiin. Ak koam toriitik che koroomen eng' kemei, ak koam tyong'ik tugul che po timiin eng' peetuusyegap kaitityet.

⁷ Ki ipchin eng' peetuunooto Kamuktaindet ne Toroor ne po lugoosyek kagoochinet ne po piik che kooen ak ko ng'orng'oren, ak eng' piik che imuisei che neegit ak looen, pororyet ne kiim ak koterteerisyei, ne pcheei `ainoosyek emennywa, agoi tulweetap Zion, nooto komosta ne mi kainetap Kamuktaindet ne Toroor ne po lugoosyek.