ISAIAH 17 - BUKUIT NE TILIIL Sireet ne Dutero Kanon

Kiit ne ya ne nyoonjin Damasko

¹ Maotenet agobo Damasko. Ogeero, kageisto Damasko, si mata koek nganaseet, ak egu karaatya.

² Kigebagaakta nganasoogap Aroer; punjin akwotisyegap keechiirek che ruitos, ama mi chii ne imui.

³ Iwong'ugei kogeny irimeetap Ephraim, ak kowong'kei laitornatetap Damasko, che ki ng'et che po Syria ko kergeitu ak toroornatetap lagogap Israel, mwaei Kamuktaindet ne Toroor ne po lugoosyek.

⁴ Nyerotitu toroornatetap Jakobo eng' peetuunooto, ak kosagit poortanyi.

⁵ Ak kergeitu ak ye iyumi peek kesiindet, ak kesei eunnyi peek, kergeitu ak ye kesei chiito peek eng' atebweetap Repaim.

⁶ Nganda uu nooto, kong'etu turoonik, ko uu ye kitumdumi mseituni, ak kong'etune logoek aeng' anan ko somok eng' temeet ne tabanu parak, ak kong'etune ang'wan anan ko muut eng' mooriik che ki iwakta kolooegitu che po keetit ne rurei, mwaei Kamuktaindet ne Toroor, Kamuktaindetap Israel.

⁷ Inyali peetuunooto chii Yaindennyi, ak kogeerei Ineendet ne Tiliil ne po Israel.

⁸ Ama koiti kapkorosusyek kole kiy, poisyonigap eunekyik, anan koiit kole kiy kiit ne ki yai eng' moriikyik, anan keetiik che po ole kisaae, anan kanamonigap asiista.

⁹ Igeitu eng' peetuunooto nganasookyik che kiimeen komoswek che kigebagaakta eng' timiin, ak eng' tulweet parak, che kiga kebagaakta eng' taitap lagogap Israel, ak koek karaatya.

¹⁰ Amu kiutye Kamuktaindetap yetuneng'ung', ama ibwaat rwandetap kimnateng'ung'; igoole anyun keetiik che korooron, ak keetiik alak che teer;

¹¹ ing'ote eng' peetuutap kolseng'ung', ak igoochini koyesyo kesweguk karon; ago mwee kesisyet eng' peetuutap arageneet ak ne po nyalilda ne ng'waan.

¹² Pwo! Polatetap piik che chaang', che morortos ko uu nyanjosyek! Pwo! Pororyosyek che rwaei ko uu rwaetap peek che kiimeen!

¹³ Ruaei pororyosyek ko uu rwaetap peek che chaang', ago kerei kong' ineendet icheek, ak komwei kolooegitu. Ak keon ko uu meteteek che ibei usoonet eng' tuloonook, ak ko uu ye arureni temburyek eng' kipchurchuryet.

¹⁴ Ogeero, mi kamuiset koskoleny, ak kobetyo kotom koeech! Niito kebebertap icheek che luuleech, ak ko kebebertap icheek che rebenech.