ISAIAH 14 - BUKUIT NE TILIIL Sireet ne Dutero Kanon

Kimutu Israel koweek emennywa

¹ Amu riiree Kamuktaindet ne Toroor Jakobo, ak ta koleweni Israel, ak konde icheek emennywa; ak konamgei toondet ak icheek, ak konamgei ak kootap Jakobo.

² Ak komut pororyosyek icheek agoi oldanywa, ak kobunji kootap Israel pichooto eng' emetap Kamuktaindet ne Toroor, koek otwogik ak tiibiik che otwogik. Ak koluul Israel icheek che kiga luul icheek; ak koboi usiikwak.

Meetap laitoryatap Babilon

³ Ak imwa kalewenoni agobo laitoryatap Babilon eng' peetuut ne koonin Kamuktaindet ne Toroor kamuung'et eng' arageneng'ung', ak eng' nyalildang'ung', ak eng' otisyet ne uui ne ki kibirchin,

⁴ ile, haa, ki kowong'kei usiindet! Ki kowong'kei koroomnateet!

⁵ Kigoiri Kamuktaindet ne Toroor kirokta kiptengeginik, kirokto ne po pounik,

⁶ che kibir pororyosyek eng' nereegek eng' piretap kotugul, che kiboi pororyosyek eng' nereegek, eng' usiisyet ne ma kirinda chii.

⁷ Mi ng'wony komugul kamuung'et ak kaalyeet; tyendos icheek kogeny.

⁸ Ee, poiboitu piribirinik eng' inyee, ak taragonigap Lebanon, koleen, “Kobooch ngap iru, koma ebech chii.”

⁹ Kagotumdumgei ye mi che ki kobek eng' oriit kotorogun ye inyone; ing'eetun piik che ki kobek, agot piik che eecheen che po ng'wony; kagong'eet eng' ng'echerokwak che po laitornatet laitorinik tugul che po pororyosyek.

¹⁰ Waluun tugul koleenjinin, “Tos keegu ne nyalulat ko uu acheek? Keige acheek?”

¹¹ Kagichoorta etunateng'ung' kwo ye mi che ki kobek, kobooto cheetap kibugandiniguk. Isyebe kuutik, ak kotuchin kuutik.

¹² Ha-a, kaibut eng' kipsengwet, inyee, kecheiyatap peet, weeriitap karon! Ha-a, kagiebin ibut, inyee ne ki inyerat pororyosyek!

¹³ Ki imwa eng' muguleldang'ung' ile, “Atogostoi kipsengwet, atoroori ng'echerennyu ne po laitornatet kosiir kecheigap Kamuktaindet; atebee tulweetap tuiyet, eng' komoswek che looen che po murot kaataam.

¹⁴ Atogostoi asiir poolik; aigeitu Ineendet Ne Toroor Miising'.”

¹⁵ Ago anyun, kichoortoin iwe ye mi che ki kobek, agoi komoswek che looen che po keriinget.

¹⁶ Injururin che keerin, kobwaatin kole: “Tos chiichito ne ki igoochi ng'wony kobotan, chiichito ne kiitumdum laitornatosyek,

¹⁷ ne ki yai ng'wony koek surkwen, ak koluul nganasookyik, ne ma ityaach kimonjororinikyik koba kooriikwak?”

¹⁸ Ruitos laitorinik tugul che po pororyosyek eng' toroornatet, ruei age tugul eng' koonnyi.

¹⁹ Ago kagiwiirchin saang' eng' kerering'ung' ko uu temeet ne kiwechei, ko uu ngoroigap che ki kibar, che ki kitoore rotwetap chok, che rektoi agoi koigap keriinget; ko uu muusto ne kityechei.

²⁰ Motuitosi kobooto icheek eng' tubeet, amu ki ing'em emeng'ung', ki ibar piiguk. Ma kemwaei koigeny iyoteetap piik che yaei yaityo.

²¹ Ochopchi lagokyik parisyet amu ng'oogistap kwanisyekwak; si mang'eetyo ak konam ng'wony kobunji, ak konyiit nganasook ng'wonyuni.

Ng'emisyet ne king'emei Babilon

²² Mwaei Kamuktaindet ne Toroor ne po lugoosyek kole: “Ang'eete agirinde icheek ak aiste eng' Babilon kainet ak icheek che ki ng'et, weeriit, ak weeriitap weeriit.

²³ Ak agoochi komeny emonooto chepswererinik, ak tamboinigap peek. Ak abuge kabugoitap ng'emisyet, mwaei Kamuktaindet ne Toroor ne po lugoosyek.”

Ng'emisyet ne king'emei Assyria

²⁴ Ki koyoosyo Kamuktaindet ne Toroor ne po lugoosyek, kole, ko uu ye ki abwaat iman, ko yaaksei ko uu nooto; ak ko uu ye ki achop, kotebyei ko uu nooto,

²⁵ ale atonatoni piigap Assyria eng' emennyu, ak atyech eng' tuloonookyuk; koistoegei eng' icheek choginnyi, ak koistoegei lautyennyi tigikyennywa.

²⁶ Niito chobeet ne kigechop agobo ng'wony komugul; ak ni ko euut ne ki kichuulji pororyosyek tugul.

²⁷ Amu Ki kochop Kamuktaindet ne Toroor ne po lugoosyek, ko tos ng'oo ne walei koek puch? Chuulaat eunnyi, tos ng'oo ne arunyi?

Kiit ne ya ne nyoonjin Philistia

²⁸ Ki piit lautyoni eng' kenyiit ne kimee Laitoryat Ahaz.

²⁹ Amebaibaitu, inyee tugul, ee Philistia, amu kagoil kirokto ne kibirin; amu mang'une tigityotap ndaret ereneet, ak egu iyotennyi ereneet ne tirireni, ne uu maat.

³⁰ Ak koamis kiboretook che po kibananook, ak koruiyo eng' chametapkei che ma tinyei kiy; ak abare rubeet tigityondeng'ung', ak kebar cheguuk che ng'etu.

³¹ Itee, ee ormariichet; riir, ee nganaseet; kaichoot, ee Philistia, inyee tugul; amu mang'une iyeto murot kaataam, ama tononi chii ineegei eng' peetuusyekyik che ki king'at.

³² Kiwoljin nee anyun piik che kiyooktoi, che po pororyet? Kele, “Kagolumda Kamuktaindet ne Toroor Zion, ak komwechi olooto piikyik che ki kius.”