ISAIAH 10 - BUKUIT NE TILIIL Sireet ne Dutero Kanon

¹ Pwo eng' icheek che ng'atei ng'atuutik che ma po iman, ak eng' icheek che sirei kamaaset,

² kobeet ne nyalili eng' kirwooget, ak korebe imanit kibananogap piikyuk, si kobiit koek mosoogik parunenikwak, ak si kobiit koluul che ma tinyei sigiik!

³ Oyae nee anyun eng' peetuut ne ityinok pireeng'wong', ak eng' ng'emisyet ne punu ole loo? Omwechini ng'oo kotoretook? Ak ondoi ano toroornateng'wong'?

⁴ Ing'uruukyin icheek kimonjororinik, ak kobutyi ole ki kibarchi piik. Nganda uu nooto, koma istogei nereegekyik, ago ta ko chuulaat eunnyi kora. Menoteetap Assyria ak pirennyi

⁵ Pwo eng' Assyria, kirokto ne po nereegekyuk, kirokto ne po ineendet ne mi nereegekyuk eunnyi!

⁶ Ayooktoi kobargei ak pororyet ne ya, ak agoochini kobargei ak piik che anereekyini, si koluul ak koip parunenik, ak ketyech icheek ko uu ye kityechi ng'atateek eng' ooreet.

⁷ Ago ma ibwaati ko uu nooto, ama mi muguleldanyi ko uu nooto; ago machei muguleldanyi kong'emis, ak kowong' pororyosyek che chaang'.

⁸ Amu ki mwa kole, “Tos, ma laitorinik pounikyuk tugul?

⁹ Tos, ma uu Kalno Karkemish? Tos, ma uu Hamath Arpad? Tos, ma uu Samaria Damasko?

¹⁰ Ko uu ye kagonyoor eunnyu laitornatosyegap kanamonik, che siirei itoonwekwak che ki kiwai che po Jerusalem ak che po Samaria;

¹¹ tos mayachini Jerusalem ak kanamonikyik ko uu ye ki ayachi Samaria ak kanamonikyik?”

¹² Nooto anyun ye tuun kagoyai Kiptaiyat poisyennyi komugul eng' tulweetap Zion ak eng' Jerusalem, abir anyun logoegap menoteetap muguleldo ne po laitoryatap Assyria, ak toroornatetap kachaunennyi pogei.

¹³ Amu ki komwa kole, “Ki ayai niito eng' kimnateetap eunnyu, ak eng' utaatyennyu, amu aguitosi; ki aiste kiwotosyegap pororyosyek, ak ki arebee konoraikwak, ak ki aming'in icheek che tebee ng'echerogap laitornatet, ko uu chiito ne nyigan.

¹⁴ Ko uu keswetap toriityon ne nyooru chii, ko ki konyoor eunnyu mogornatosyegap pororyosyek; ak ko uu ye iyumi chii mayaik che kigelakta, ki ayum ko uu nooto ng'wony komugul; ak ma piit ne kibirabirto kebepchet, anan ne kitwek, anan ne ki ite.”

¹⁵ “Tos ichaugei aiywet eng' ineendet ne ebisye? Tos ieetegei musumeneet eng' ineendet ne tilisye? Ko uu nda itumdumi kirokto ne namei, anan nda namjin parak kirokto ineendet ne ma keetit!”

¹⁶ Igoochin anyun Kiptaiyat Kamuktaindet ne Toroor ne po lugoosyek, piikyik che neryootiin kosagityo, ak tuun piitu liplibenet ne uu ne po maat ne lalei, ne kigeere toroornatennyi.

¹⁷ Ak koek maat lapkeiyetap Israel, ak koek nenyi Ne Tiliil liplibenetap maat, ak kobeel kowong' katookyik che rutei piich ak che toorei piich peetuunak.

¹⁸ Ak kobeel ineendet toroornatetap osnennyi, ak ne po mbareennyi ne rurei, kobooto saboondo ak poorto, ak koek ko uu ye tanui ineendet ne ibooti songolyet.

¹⁹ Ng'ering'itu keetiik che ng'etu che po osnennyi, kot komuuch koiit lakwa.

²⁰ Eng' peetuunooto koma kotiegei kogeny che ki ng'et eng' Israel, ak icheek che kichililyo eng' kootap Jakobo, ineendet ne kibirei icheek; ago tiegei Kamuktaindet ne Toroor iman, Ineendet ne Tiliil ne po Israel.

²¹ Weekyingei Kamuktaindet ne po kamuktaet, icheek che ki ng'et, agot icheek che ki ng'et che po Jakobo.

²² Agot nganda uu piiguk che po Israel ng'aniek che po nyanjet, koweeksei piik che ng'etu kityo eng' icheek. Kigeng'at kagesunet eng' icheek, ne ng'elyektoi eng' imanda.

²³ Amu yaei Kiptaiyat, Kamuktaindet ne Toroor ne po lugoosyek, kagesunet ne kigeng'at, eng' kwenutap ng'wony tugul.

²⁴ Mwaei anyun Kiptaiyat, Kamuktaindet ne Toroor ne po lugoosyek, kole, “Ee piikyuk che menyei Zion, amoiywei Assyria; nganda pirin eng' kirokto, ak konamjin parak agobo inyee, ko uu piteetap Misiri.

²⁵ Amu ta komi kitigin miising', si kosulda nereegek, nereegekyuk eng' ng'emisyennywa.

²⁶ Ak kong'eetyi Kamuktaindet ne Toroor ne po lugoosyek ineendet pireet, ko uu parisyetap Midianik eng' rwandetap Oreb. Tuun pou kiroktonyi nyanjet, ak konamji parak ko uu piteetap Misiri.

²⁷ Ak eng' peetuunooto, koistoegei tigikyeng'ung' lautyennyi, ak koistoegei kaating'ung' choginnyi, ak keng'em chogit amu kaiilet.” Kagotogosta ineendet kwo eng' Rimmon,

²⁸ kagoit Ayaat, kagosiir Migron, kagonoree tuguukyik Mikmas;

²⁹ kagoba kosiir ole kibunei, kagoru Geba; potani Ramah, kamwei Gibea ne po Saulo.

³⁰ Waach miising', ee cheptap Galim! Ep iit, ee Laisha! Woljin ineendet, ee Anatoth!

³¹ Kamwei Madmena, iyumigei piik che menyei Gebim si komwei.

³² Tonone Nob eng' peetuuni po rani, ing'wereri tulweetap cheptap Zion, tulweetap Jerusalem.

³³ Ogeero, tuun ebei Kiptaiyat, Kamuktaindet ne Toroor ne po lugoosyek, mooriik eng' kamuiset; kiluulei che kooen, ak kinyeroti che ieetegei.

³⁴ Ak koluule ineendet kariik timiin ne oo, ak koluul Lebanon ineendet ne kiim.