HOSEA 8 - BUKUIT NE TILIIL Sireet ne Dutero Kanon

Saaei `Israel kanamonik ak nyooru pireet

¹ Kuut iryageet. Nyoonji kootap Kamuktaindet ne Toroor ko uu kipsiichit: amu ki kobistoe icheek kayomisennyu, ak kongelelji ng'atuutikyuk.

² Tuun riirchino kole, kamuktaindennyu, kingenin acheek Israel.

³ Ki kometa Israel kiit ne ki myee: isubi puunyoot ineendet.

⁴ Ki konde laitorinik, ago ma teebena; kigonde pounik ama anai: kiyachigei kanamonik eng' fedhaisyekwak ak eng' thahabusyekwak si kobiit keisto.

⁵ Ki kometo moitang'ung', ee Samaria, kagolaany parak nereegekyuk agobo icheek: tyanitu si koek piik che ma tinyei tengek?

⁶ Amu ki punu niito Israel; kiyaei musogindet, ama Kamuktaindet: ee, kitonatoni moitap Samaria.

⁷ Amu koolei usoonet, ak kesei kipchurchuryet: ma tinyei peek che tonondos; ma iitos itigap peek; ngot koiiyo, koamei kipsagarek kotarei.

⁸ Ki kelugui Israel: mi icheek nguno kwenutap pororyosyek ko uu tereet ne ma kotilei kiy.

⁹ Amu kitogosta koba Assyria, ko uu sigiryet ne po timiin ne mi ineegei: ki al Ephraim chamanik.

¹⁰ Ee, agot nganda alei eng' pororyosyek, ayumi anyun icheek; ak kotoi kong'ering'itu amu nyigiisindap lautyet ne ki igoochi icheek `laitorinik ak pounik.

¹¹ Amu ki kotes Ephraim kapkorosusyek si koyae tengekto, ki koek kapkorosusyechooto tengek eng' ineendet.

¹² Agot nda asirchini ineendet ng'atuutikyuk eng' kaneetisyosyek eliphuusyek taman, kiiti chooto keele tugun che ma nootin.

¹³ Ye enyei icheek tiseiywegap kagoochinoikyuk, kogoitoi panyeek ak koamei; ago mataachei Kamuktaindet ne Toroor chooto: ibwaati anyun ineendet tengektonywa, ak koiityi pireet amu tengekwogikwak; weekyingei Misiri.

¹⁴ Amu kigoutye Israel Yaindennyi, ak koteech kooriigap laitorinik; ak ki kotes Judah nganasook che ng'ootaatiin: ago ayookyini maat nganasookyik, ak kobeel irimoikyik.