HOSEA 6 - BUKUIT NE TILIIL Sireet ne Dutero Kanon

Soomet keeweekyigei Kamuktaindet ne Toroor

¹ “Obwa, keeweekyigei Kamuktaindet ne Toroor: amu ki kogereerech ak konyaech; ki kobirech ak inyaech.

² Isoobech ye ibata peetuusyek aeng'u: ak kong'eeteech eng' peetuut ne po somok, ak kesapche eng' tainnyi.

³ Ongenai anyun, ongetestai kenai Kamuktaindet ne Toroor; mong'u iman ko uu ye eechei: ak nyoonjinech ko uu ropta, ko uu ropta ne po let ne ibisi ng'wony.”

⁴ Ee Ephraim, ayaun nee? Ee Judah, ayaun nee? Amu uu myeeindong'wong' pooldet ne po karon, ak ko uu rewoot ne sip kobetei.

⁵ Ki awai anyun icheek eng' maotik; ki abare icheek ng'aleegap kutinnyu: ak uu kirwoogutiguk lapkeiyet ne mong'u.

⁶ Amu amache rireenetapkei, ma mache tiseiywot; ak amache naet konai Kamuktaindet kosiir kagoochinoik che kibeelei.

⁷ Ago ki kobistoe icheek kayomiset ko uu Adam: ki koberbera eng' olooto.

⁸ Gilead ko nganaseetap icheek che yaei tengekto, ki kimurwon eng' korotiik.

⁹ Ko uu ye sapchin lugosyegap rebiik chii, ko uu nooto kweanetap tisiik, parisyoti eng' ooreet ne tokyingei Shekem; ee, ki koyai yaityet.

¹⁰ Ki ageer kiit ne samis eng' kootap Israel: mi kugoinatet, Ephraim: ki king'wanit Israel.

¹¹ Ee Judah, mi kogeny kesisyet ne kigeng'atun, ye tuun amutu kogeny piikyuk che kigeluul.