HOSEA 14 - BUKUIT NE TILIIL Sireet ne Dutero Kanon

Kigoigoi Israel koweekyigei Kamuktaindet ne Toroor

¹ Ee Israel, weekyigei Kamuktaindet ne Toroor Kamuktaindeng'ung'; amu ki ibut eng' tengektong'ung'.

² Ip ng'aleek, ak iweekyigei Kamuktaindet ne Toroor: ileenji ineendet: Iste tengekwogik tugul, ak itaach che myach: kigoitoi anyun kagoochinetap kutusweekyok ne kata kigoitoi kiruugik.

³ Ma sarwech Ashur; ma kilaanye paraisisyek: ama keleenjini kogeny poisyonigap eunekyok, Oo kamuktaikyok: amu nyoorunenen rireenet icheek che ma tinyei kwanisyek.

⁴ Asoobi kachuchugeng'wong' pogei, achame icheek miising': amu kogoistoegei ineendet nereegekyuk.

⁵ Aigeitu rewoot eng' Israel: yiei ineendet ko uu taapteet ne karaaran, ak kowakta tigitikyik ko uu Lebanon.

⁶ Iwaktoi mooriikyik, ak koigei mseituni karaaranindanyi, ak koigei siiptanyi Lebanon.

⁷ Weeksei icheeget che menyei urwennyi; saptos ko uu peek, ak koyiei ko uu keetitap sabibuk: igeitu ng'uunennyi ne po divaigap Lebanon.

⁸ Tuun mwaei Ephraim kole, ta keting'egei nee kogeny ak kanamonik? Kaawolu, ak ageer ineendet: auu piribiret ne tuon; punwa logoeguk.

⁹ Ng'oo ne ng'oom, si koguiyo tuguuchuuto? Ng'oo ne utaat, si konai tuguuchooto? Amu lititen ortinwegap Kamuktaindet ne Toroor, ak pendotee che po iman ortinwechooto; ago ibutyin olooto pistoik.