HOSEA 13 - BUKUIT NE TILIIL Sireet ne Dutero Kanon

Nyoonjin Israel kirwooget

¹ Ye kingo ng'alaal Ephraim, kobiit potanet; kiitoroorgei eng' Israel: ago kime ye ki ingelel eng' Baal.

² Ak yaei nguno icheek tengekto kosiir, ak koyachinegei fedhaisyekwak kanamonik che kitanyi, ki yai kanamonik ko uu naennywa, po chooto tugul poisyetap kitang'ik: mwaei agobo tuguuchooto kole, ingong'utut moek piik che eng'sei.

³ Kergeitu anyun ak poldetap karon, ak rewoot ne sip kobetei, ak ko uu meteteek che ibei kipchurchuryet eng' rwanyut ne kiboorsee, ak ko uu iyeto ne mandoe soiyet.

⁴ Ago, aa Kamuktaindet ne Toroor Kamuktaindeng'ung' kobooch emetap Misiri: amecheeng'jigei kamuktain ne teer, kobatena aneege, ama mi yetindet age kobatena.

⁵ Ki ariibin teer eng' surkwen, eng' emetap kemeut ne oo.

⁶ Kibiyong'so ko uu kiit ne ki uu ole ki agete; kibiyong'so, ak kiitoroorgei eng' mugulelwekwak: kigoutyeno anyun.

⁷ Auu anyun eng' icheeget ng'etundo: asapchini eng' ooreet ko uu cheplanget:

⁸ kituitosi ak icheek ko uu magalaluut ne kagibare aarekyik, ak agereer kwambelelyetap mugulelwekwak: ak ageesu icheek eng' yooto ko uu ng'etundo; tonatoni tyondap timiin icheek.

⁹ Ng'emisyeng'ung' niito, ee Israel, amu igirindaa, igirindoi toretindeng'ung'.

¹⁰ Mi ano anyun laitoryandeng'ung', si kobiit kosaruun eng' nganasoguk tugul? Ak mi ano kirwoogiguk, che ki imwa ile, Koono laitoryat ak pounik?

¹¹ Ki agoonin laitoryat eng' nereegekyuk, ak ki aiste eng' nereegekyuk.

¹² Ratat yaityetap Ephraim, konorat tengektanyi.

¹³ Pwaanjin ineendet aragenosyek che po kwondo ne machei kosigiis: ineendet ko weeriit ne ma ng'oom; amu kait peetuut ne ma nyoljin kota kotebee moo.

¹⁴ Atyachi icheek komong' eng' kimnateet ne po kererit; asaru icheek eng' meet. Ee meet, mi ano korotweguk? Ee kererit, mi ano ng'emisyeng'ung'? Ma awale kabwaatutikyuk.

¹⁵ Agot ngo nyoor perurto ineendet eng' kwenutap tupchosyekyik, konyonei usoonetap kong'asiis, togosu kabuusetap Kamuktaindet ne Toroor eng' surkwen, ak koteeny kondanyi ne po peek, ak koteeny kondametunnyi: luulei konorwetap tuguukyik tugul.

¹⁶ Ibei Samaria ng'oogistonyi; amu ki kongelelji Kamuktaindennyi: ibutos eng' rotwetap chok; kitonatoni lagokwak, ak kegereer kwonyiikwak che tamonosyek.