HOSEA 12 - BUKUIT NE TILIIL Sireet ne Dutero Kanon

¹ Paegei Ephraim usoonet, ak kosuboti usoonetap kong'asiis; tesei kotugul lembechek ak ng'emisyet; ak koyomisegei kobooto Assyria, ak keip mwanik koba Misiri.

² Ibeligei kogeny Kamuktaindet ne Toroor ak Judah, ak kobir Jakobo ko uu ortinwekyik; yaakyin ineendet ko uu poisyonikyik.

³ Ki nam kwaryatap ng'eetap kamet komi moo; ak ki tinyei kimnateet kobooto Kamuktaindet ko kagoeet:

⁴ ee, ki tinyei kimnateet koterteer malaikaiyat, ak ki iterteer. Ki riir, ak kosa ineendet: kinyoorchi `ineendet Bethel, ak ki ng'alaalwech eng' olooto;

⁵ ineendet Kamuktaindet ne po Toroornatet ne po lugoosyek; Kamuktaindet ne Toroor ko kainennyi.

⁶ Iweekyigei anyun Kamuktaindeng'ung': riip rireenet ak kirwooget, ak igen Kamuktaindeng'ung' kotugul.

⁷ Chemung'araindet ineendet, mi eunnyi tuguugap lembech che kegerisye che po ng'aalseet: chamei kochiile piich.

⁸ Ak ki mwa Ephraim kole iman, kaaegu mogoryot, kaanyooru mogornateet; ma tuun nyooru icheek yaityet ne kitengekto, eng' poisyonikyuk tugul.

⁹ Ago aa Kamuktaindet ne Toroor Kamuktaindeng'ung' kobooch emetap Misiri; taagoonin kogeny imeny emaisyek, ko uu eng' peetuusyegap igoorto ne ki king'at.

¹⁰ Ki ang'alaalji maotik, ak ki ates ng'ang'utik; ak ki aboisyee kalewenaik eng' poisyetap maotik.

¹¹ Tos mi tengek Gilead? Puch piikwak tugul; enyei kiruugik eng' Gilgal: kapkorosusyekwak ko uu koik che kagiruruuch eng' mbar ne ibatat.

¹² Ak kimwechi Jakobo emetap Aram, ak ki otis Israel agobo osotyot, ak ki iyagis si kobiit konyoor osotyot.

¹³ Ak ki imoong' Kamuktaindet ne Toroor Israel eng' emetap Misiri eng' maotyot, ak kiriiboot maotyot ineendet.

¹⁴ Kitagis miising' Ephraim: nooto anyun tebee korotiikyik ineendet, ak koweekyi Kiptaiyandennyi ineendet teweernatennyi.