HOSEA 11 - BUKUIT NE TILIIL Sireet ne Dutero Kanon

Chamyetap Kamuktaindet ne Toroor ne ting'ee Israel

¹ Ki achame Israel kota ko ming'in, ak ki aguur weeriinnyu komong' eng' Misiri.

² Kinga testai aguur icheek, ko testai koistoenagei; ki eng'ji Baalik, ak kobeelji nyamdutik kanamonik che ki kiwai.

³ Ago ki anee ne ki aneet Ephraim kowendot; ki aganabate eng' eunekyuk; ago ki ma nai kole ki asoobi icheek.

⁴ Ki achuutune icheek poroonigap chii, kobooto rogoonigap chamyet; ak ki auu eng' icheek icheeget che istoi chogit eng' tagilgilikwak, ak ki ande amitwogik tainnywa.

⁵ Ma weekyingei ineendet emetap Misiri; ago egu `Assyrianindet laitoryandennyi, amu ki eesyo icheek koweigei.

⁶ Ak kobutyi rotwetap chok nganasookyik, ak kogees temeleiywekyik, ak koam icheek, amu kirwoogutikwak.

⁷ Kagobegechi piikyuk kochuchuigei kometaa: agot ngo kuurso icheek koguurchi icheek ineendet ne mi parak, koma piitu ne itoroori ineendet.

⁸ Amuktoi ano ameteen, inyee Ephraim? Amuktoi ano asaruun, inyee Israel? Amuktoi ano ayain iige Adma? Amuktoi ano ayain iige Seboim? Kagowalak muguleldanyu, kagorira moo.

⁹ Ma yae koroomnatetap nereegekyuk, ma weeksei ang'eme Ephraim: amu aa Kamuktaindet, ma aa chii; Ineendet ne Tiliil ne mi kwenung'ung': machute nganaseet.

¹⁰ Pendoti icheek kosuboti Kamuktaindet ne Toroor, ne poriseni ko uu ng'etundo: amu poriseni ineendet, ak kobwa lagok kobotanionu kobunu cherongo.

¹¹ Pwoonei kobotanionu ko uu toriityon ne mang'une Misiri, ak ko uu cheptuget ne mang'une emetap Assyria: ak agoochi icheek komeny kooriikwak, mwaei Kamuktaindet ne Toroor.

¹² Yiemena Ephraim lembechek, koyiemena kootap Israel ng'aalseet: ago pounisyei Judah kora kobooto Kamuktaindet, ak koyanaat eng' Ineendet ne Tiliil.