HEBRANIK 9 - BUKUIT NE TILIIL Sireet ne Dutero Kanon

Arorutyet ne po tai

¹ Nooto anyun, agot arorutyet ne po tai ko ki tinyei ng'atuutigap saaet, ak komostanyi ole-tiliil, ne po ng'wonyuni.

² Amu kiga kichop emait; ne po tai ko ole ki mi keldap tait, ak meset, ak magatiinik che itabaanatiin; ne kiguure ole-tiliil.

³ Ak ki ngesiir angeet ne po aeng', ne ki kioiye koot, ko ki mi emait ne kiguure ole-tiliil Kosiir Tugul;

⁴ ne tinyei kapkorosutap thahabu, ak moingetap arorutyet ne ki kiliige thahabu komoswek tugul, ole ki mi tereet ne po thahabu ne ki mi mana, ak kirokto ne po Aron ne ki ing'ati, ak koik che po arorutyet;

⁵ ak ki mi paragunnyi kerubisyegap liilindo che ki iuuri kerwetap rireenet; tuguuk che ma kimuuchi keng'alaale nguno agenge agenge.

⁶ Ak kingo kagechop anyun tuguuchuuto ko uu nooto, koba tisiik kotugul emait ne po tai, koyaei poisyosyegap saaet;

⁷ ago, kiwendi tisiindet ne oo ineegei emait ne po aeng' konyil agenge eng' kenyiit, ama wendi ama tinyei korotiik, che igoitoi agobo kei, ak agobo lelutigap piik.

⁸ Ibooru Kabuuset ne Tiliil eng' ng'olyoondoni kole, ki tom keng'aany ooreet ne mong'jin ole-tiliil, ye kita ko tononot emait ne po tai;

⁹ ne kalewenetap peetuusyechu; ki kigoitoi eng' kalewenonooto agine kagoochinoik ak tiseiywek, che ma imuuchi koyai chiito ne saaei koek ne ititaat eng' kabwaatennyi,

¹⁰ amu (kobooto amitwogik ak che kieei ak kaunsosyek che teerchiin) chooto ko ng'atuutik che po poorto kityo, che ki king'at agoi peetuusyek che po kalititet.

¹¹ Ago Kristo, ye kingo kagonyo, ne ineendet tisiindet ne oo ne po tuguuk che myach che tuun pwoonei, eng' emait ne oo ak kogesunotkei kosiir, ne ma kiyae eunek, ye kiweech, koma po ng'wonyuni,

¹² ama eng' korotiigap kwesik ak moek, ago eng' korotiikyik icheegei, kwo anyun ole-tiliil konyil agenge ak koyam, ye kingo kagonyoor katyaget ne po koigeny.

¹³ Amu ngot kotiliili agoi kaunetap poorto korotiigap kwesik ak kiruugik, ak oreegap rooryat che ki ise icheek che tinyei murwoonindo:

¹⁴ kotiliili anyun ne tya korotiigap Kristo, ne ki igoochigei Kamuktaindet eng' Kabuuset ne po koigeny, koma tinyei peruut, kotiliil kabwaateng'wong' eng' poisyosyek che meiyotiin si oboisyechi Kamuktaindet ne sabei!

¹⁵ Ak amu ng'olyoondoniito ineendet ko katuiyoindetap kayomiset ne leel, si kobiit konyoor che kigeguur, arorutyetap poroteet ne po koigeny, ye kingo kagobiit meet agobo katyagetap pistaosyek che ki miitei eng' kayomiset ne po tai.

¹⁶ Amu ole miitei arorutyet ne po nametap tuguuk ko kanyool komiitei meetap ineendet ne kiyaei.

¹⁷ Amu tinyei arorutyet kimnateet ye kabiit meet: tos kiim kota kosabei ineendet ne kiyaei?

¹⁸ Eng' nooto anyun agot arorutyet ne po tai, ko ki ma kigoito koma mi korotiik.

¹⁹ Amu ye kingo kagomwachi Musa piik tugul kayomiset age tugul ko uu eng' Ng'atuutyet, konam korotiigap moek ak che po kwesik, kobooto peek ak koroorik che piriireen ak husop, ak kois bukuit, ak piik tugul,

²⁰ komwaei kole, “Chu ko korotiik che po arorutyet ne ki ng'at Kamuktaindet agobo okweek.”

²¹ Ak koisee kogeny korotiik emait kobooto tuguuk che kiboisyee.

²² Ak eng' Ng'atuutyet ko uu keele, kitiliili tuguuk tugul eng' korotiik, ak ngo ma mi tumdaetap korotiik koma mi nyoetap kaat.

Kristo tiseiywot ne ineegei

²³ Kinyolu anyun kitiliil itoonwegap tuguuk che po kipsengwet eng' chooto; ago kitiliile tuguuk che po kipsengwet tiseiywek che myach kosiir chuuto.

²⁴ Amu ki ma mong'ji Kristo ole-tiliil ole ki kiyae eunek, ne karogutyetap tuguugap iman; ago ki mong'ji kipsengwet ineendet, si kotaagu eng' taitap Kamuktaindet agoi acheek:

²⁵ ma si kogoitogei konyil che chaang': ko uu ye wendi tisiindet ne oo ole-tiliil eng' kenyiit age tugul koibei korotiik che ma chechiik;

²⁶ amu nda ki uu nooto anyun ta kinyooljin konyalil konyil che chaang' kobooch ngelumda ng'wony; ago kagong'ang'ak nguno konyil agenge eng' kagesunetap kenyiisyek si kobiit koisto tengekto eng' tiseiywot ne ki ineendet.

²⁷ Ak ko uu ye ki king'at agobo piik kobek konyil agenge, ak ye ibata niito koek kirwooget;

²⁸ ko uu nooto Kristo agine, kingo kagigoito konyil agenge si koip tengekwogigap che chaang', ko tuun taagu ne po aeng', ma agobo tengek, ago agobo icheek che igeni ineendet agoi yetunet.