HEBRANIK 8 - BUKUIT NE TILIIL Sireet ne Dutero Kanon

Tisiindet ne Oo ne po Arorutyet ne leel

¹ Nguno anyun, eng' tuguuk che kimwae, kiit ne oo ko ni: ki tinyei tisiindet ne oo ne uu ni, ne kitebee komostap euut ne po tai ne po ng'echereetap Laitornatet ne po Etunateet eng' kipsengwet,

² kiboityot ne poisye eng' ole-tiliil ne emait ne po iman, ne kilumei Kiptaiyat, ma piik.

³ Amu kindoi tisiindet age tugul ne oo si kogoitoi kagoochinoik ak tiseiywek: nooto anyun konyolu kotinyei agine tisiindoni kiit ne igoitoi.

⁴ Nda mi ng'wony, ta ma egu tisiindet, amu mi icheek che igoitoi kagoochinoik ko uu piteetap Ng'atuutyet;

⁵ che poisyei eng' karogutyet ak urwetap tuguuk che po kipsengwet, ko uu ye ki kiteechi Musa ye kimachei kotonon emait: amu ki leenji, Riip, si iyai tuguuk tugul ko uu kergeindo ne ki kiboorun eng' tulweet.

⁶ Ago kagosich nguno poisyet ne myee kosiir, ko uu nooto agine, ineendet ko katuiyoindet ne po kayomiset ne myee kosiir, ne ki kiyai eng' arorutik che myach kosiir.

⁷ Amu nda ki ma ko rartaat arorutyet ne po tai, ko kimatata kecheeng'jin poroindo ne po aeng'.

⁸ Amu ye kingo nyoorchi lelutik icheek, komwa kole: “Ogeero, pwoonei peetuusyek, mwaei Kiptaiyat kole, che tuun kiyomisyinige kayomiset ne leel ak kootap Israel ak kootap Judah.

⁹ Ma ko uu kayomiset ne ki kiyomiske ak kwanisyekwak eng' peetuut ne ki anam eunekwak si amut komong' eng' emetap Misiri; amu ki ma koteptoi kayomisennyu, ak ki ma amage kiy icheek, mwaei Kiptaiyat.

¹⁰ Amu ni kayomiset ne tuun kiyomisyinige ak kootap Israel. Ye ibata peetuusyechooto, mwaei Kiptaiyat: Andoi ng'atuutikyuk kabwaatutikwak, ak asirchi kogeny mugulelwekwak, ak aegu Kamuktaindet eng' icheek, ak koek piikyuk.

¹¹ Amu koneeti chii tugul chiitap kokwennyi, anan koneet chii age tugul ne tupcho, koleenji, ‘Ni Kiptaiyat,’ amu tuun naa tugul kobooch ne ming'in eng' icheek kot koit ne oo.

¹² Amu tuun ariiree icheek amu tengekwogikwak, Ama tuun abwaati tengekwogikwak agoi.”

¹³ Amu ki mwa kole, “Arorutyet ne leel,” ki koyai koosit ne po tai. Ago nooto ositu ko kagotebi keny, ko neegit kogeskei.