HEBRANIK 7 - BUKUIT NE TILIIL Sireet ne Dutero Kanon

Melkisedek tisiindet

¹ Amu Melkisedeki-niito, laitoryatap Salem, Tisiindet ne po Kamuktaindet Ne Toroor Miising', ne ki tuiyo ak Abraham ye ki weeksei kobunu ole ki pare laitorinik, ak koberuur ineendet,

² ne kipchechi agine Abraham kebebertap taman ne po tugul ne ye kiweech, ko Laitoryatap imanda korook, ak yeityo kogeny ko Laitoryatap Salem, nooto ko Laitoryatap kaalyeet;

³ ne ma tinyei kwanda, ama tinyei kamet, ama tinyei ooreenywa, ama tinyei taunetap peetuusyek anan kagesunetap saboondo, ago ki kiyai kogergeit ak Weeriitap Kamuktaindet, tebyei ko tisiindet koigeny.

⁴ Obwaat anyun ole kite ooindap chiichi, ne ki igoochi Abraham, poiyot ne oo, kebeberta ne po taman ne po pareiywek.

⁵ Ak tinyei iman weeriitap Lawi che namei poisyetap tisiisyet, ng'atuutyet konam kebeberwegap taman eng' piik ko uu eng' Ng'atuutyet, eng' tupchosyekwak, agot nga ki punu poortap Abraham:

⁶ ago ki nam kebeberwegap taman eng' Abraham ineendet ne ki ma ki itito icheek eng' ooreenywa, ak koberuur ineendet ne tinyei arorutik.

⁷ Ago ne ma mi tiyet age tugul, konyooru ne ming'in kaberuret eng' ne oo.

⁸ Ak eng' yu kotaachei piik che pegu kebeberwegap taman; ago eng' olooto, ko ineendet ne kibaoryani keele sabei.

⁹ Ak, kimuuchi kemwa keele, eng' Abraham agot Lawi, ne taachei kebeberwegap taman, ko ki igoito kebeberwegap taman;

¹⁰ amu kita komi poortap kwandanyi, ye kituitos ak Melkisedek.

¹¹ Ak nda ki mi kagesunatetapkei eng' tiseinatetap Lawiik (amu ki nyoorunee yooto piik Ng'atuutyet), ko kita kimage nee kobiit tisiindet age ne uu kiit ne ki uu Melkisedek, ama kiititoi kiit ne ki uu Aron?

¹² Amu ngot kowalak tiseinateet, ko kanyool kewal agine ng'atuutyet.

¹³ Amu ineendet ne kimwaitae tuguuchu ko po pororyet age, ne ma mi chii eng' pororyonooto ne ki kobois eng' kaptisiisyo.

¹⁴ Amu taagu keele ki punu Kiptaiyandennyo ooreetap Judah; pororyet ne ki ma mwaitae Musa ng'olyoo age tugul eng' ng'aleegap tisiik.

Tisiindet age

¹⁵ Ak taagu komyee kosiir, ngot kotun piitu tisiindet age eng' kergeindap Melkisedek,

¹⁶ ne ki kiyai, ago ma eng' ooreetap ng'atuututigap poorto, ago eng' kimnateetap saboondo ne ma igeesugei:

¹⁷ amu kibaoryani keele, ii tisiindet koigeny Ko uu kiit ne ki uu Melkisedek.

¹⁸ Amu miitei metoet ne po ng'atuutyet ne kiga kindoune, amu nyalulennyi ama tilei kiy

¹⁹ (amu ma yai Ng'atuutyet kiy koek ne ititaat), ak komiitei ibunetap kamang'unet ne kaigai, ne kiriikyine Kamuktaindet.

²⁰ Ama yaaksei ama kiyasyo

²¹ (amu ki kiyai icheek koek tisiik ama mi kayasyoet eng' ineendet ne mwaei agobo ineendet kole, Ki iyasyo Kiptaiyat ama walei kole, Ii tisiindet koigeny).

²² Ko uu nooto anyun ki ek Jeso tononjinindet ne po arorutyet ne myee kosiir.

²³ Ago icheeget ko ki kiyai koek tisiik ko ki chaang' eng' koitet, amu ki eete icheek meet si ma testai eng' poisyennywa.

²⁴ Ago amu tebyei ineendet koigeny, kotinyei anyun tiseinateet ne ma kiwalei.

²⁵ Eng' nooto anyun komuuchi kogeny kosar agoi kasuldaet icheek che pwaanjin Kamuktaindet eng' ineendet, amu sabei ineendet koigeny si kobiit kosaaei agobo icheek.

²⁶ Amu nyoljinech tisiindet ne oo ne uu ni, ne tiliil, ne ma tinyei keniisyet, ama tinyei murwoonindo, ne itabaanat eng' kiptengegiinik, ak ki kitoroor kosiir kipsengwet;

²⁷ ne ma nyoljin kogoito tiseiywek peetuut age tugul, ko uu tisiichu ki eecheen, che igoitoi korook agobo tengekwogikyik, ye ibata kogoito agobo piik: amu ki yai niito konyil agenge ak koyam, ye ki igoitogei.

²⁸ Amu indoi Ng'atuutyet piik che nyalulyotin koek tisiik che eecheen; ago ng'olyootap kayasyoet, ne ki piitu let eng' Ng'atuutyet, kondoi Weeriit, ne ititaat koigeny.