HEBRANIK 6 - BUKUIT NE TILIIL Sireet ne Dutero Kanon

¹ Nooto anyun ongebagaakte mata ongeng'alaale ng'aleek che po tai che po Kristo, ak ongigiilgei agoi keit ne ititaat; amata onginde lumeiywot ne po siguunet ne punu poisyonik che meiyotiin, ak ne po kayaneet eng' Kamuktaindet,

² ne po kaneetisyetap kabatisanosyek, ak ne po kagonooretap eunek, ak ne po ng'eetyeetap che ki kobek, ak ne po kirwoogetap koigeny.

³ Ak kiyae niito, ngo cham Kamuktaindet.

⁴ Amu eng' icheek che kisip kigoochi lapkeiyet ak kochamcham konunet ne po kipsengwet, ak koek yamdoigap Kabuuset ne Tiliil,

⁵ ak kochamcham ng'olyoot ne myee ne po Kamuktaindet, ak kimnatosyegap kenyiisyek che pwoonei,

⁶ ak kochuchuigei anyun, koma imugaksei keeweekyi icheek siguunet kogeny; amu igartatyingei kogeny Weeriitap Kamuktaindet, ak kogoochi ineendet kalilanet ne taagu.

⁷ Amu emet ne ki koee ropta ne robonjin konyil che chaang' ak koii ingweek che nyoljin icheek che ki kibatyin, konyooru kaberuret eng' Kamuktaindet:

⁸ ago ngo iiyo katook che toorei piich ak che rutei piich, keesyoi ak ko neegitee chubeet; ne kagesunennyi ko kebeel.

⁹ Ago chamanichu, kiyani eng' okweek tuguuk che myachen kosiir chooto, ak tuguuk che namegei ak yetunet, agot ngemwae ko uu nooto:

¹⁰ amu Kamuktaindet, koma Kamuktaindet ne ma po iman, kot koutye poisyeng'wong' ak chamyet ne ki obarte agobo kainennyi, ye ki oboisyechini che tiliileen, ak kota oboisyechini.

¹¹ Ak kimache miising' chii age tugul eng' okweek keele kobarta kagiilonooto pogei eng' nyiietap kamang'unet agoi kagesunet:

¹² si mouuegitu, ago oyaniegei icheek che nyooru arorutik eng' kayaneet ak muitaet.

Po iman arorutigap Kamuktaindet

¹³ Amu ye kingo yachi `Kamuktaindet Abraham arorutyet, ko amu ki ma komi age ne oo kosiir ineendet ne ki imuuchi koyasyechi koyasyo agobo kei,

¹⁴ kole, “Eng' kaberuret aberuurin iman, ak eng' kayabet ayabin ibaraitu.”

¹⁵ Ak uu nooto, kingo kagomuita, konyoor arorutyet.

¹⁶ Amu iyastos piik agobo ne oo: ak kayasyoet ko kagimiitet ne igeesu tiiyennywa age tugul.

¹⁷ Eng' ng'olyoondonooto ye kingo mach Kamuktaindet miising' koboorchi icheek che nyooru arorutyet ole uu rarennyi ne ma walaksei, konde kayasyoet kwenut:

¹⁸ si eng' tuguuk aeng' che ma walaksei, che ma imugaksei eng' Kamuktaindet komwa lembech eng' chooto, kimuuch anyun kenyooru kagaigaet ne kiim, acheek che kigemwechi toreteet si kenam kamang'unet ne ki kinde tainnyo;

¹⁹ ne ki tinyei ne uu nangetap saboondo, ne kingen ak ko lumdaat ne wendi oriit kot kosiir angeet ne ki kioiye;

²⁰ ole kichut Jeso agobo acheek, koek kandoindet, ko kagoek tisiindet ne oo koigeny, ko uu kiit ne ki uu Melkisedek.