HEBRANIK 4 - BUKUIT NE TILIIL Sireet ne Dutero Kanon

Kamung'et ak piigap Kamuktaindet

¹ Ongiywei anyun yo ta komi arorutyet ne keite kamuung'ennyi, si ma leen chii age tugul eng' okweek, mata anyooru.

² Amu ki kiamwech iman logoiywek che myach, ko uu icheeget: ago ma toret icheek ng'olyootap kaseet, amu ki ma namgei ak kayanetap icheeget che kigasei.

³ Amu acheek che ki kiyan keite kamuung'onooto; ko uu ye ki komwa ineendet kole, Ko uu ye ki ayosye eng' nereegekyuk ale, Maitei icheek kamuung'ennyu: agot nganda kiga kogeskei poisyonichooto kobooch ngap kelumda ng'wony.

⁴ Amu ki komwa ko uu ni eng' komosta age agobo peetuutap tisap kole, Ak ki imuuny Kamuktaindet eng' peetuutap tisap eng' poisyonikyik tugul;

⁵ ak eng' yu agine komwa kole, “Ma itei icheek kamuung'ennyu.”

⁶ Eng' nooto anyun amu miitei poroindo ne po alak koit olooto, ak icheek che kiga keamji logoiywek che myach, ko ki mata koit amu ngelelnateet,

⁷ kamwa kogeny agobo peetuut age, komwaei eng' Daudi, ko kagobata peetuusyek alak, kole, “Rani,” ko uu ye kisip kemwa keele, “Ngot ogas kutinnyi rani ko mat ouiit mugulelwekwok.”

⁸ Amu nda kiga kogoochi Joshua icheek kamuung'et, ta ki ma kota komwaei let agobo peetuut age.

⁹ Ng'etunoot anyun kamuung'eetap sabato agobo piigap Kamuktaindet.

¹⁰ Amu ineendet ne kagoit kamuung'eetap Kamuktaindet ko kagomuuny eng' poisyonikyik, ko uu ye ki imuuny Kamuktaindet eng' chechiik.

¹¹ Ongigiilgei anyun si keit kamuung'onooto, si ma ibut chii age tugul eng' kergeinooto po ngelelnateet.

¹² Amu sabei ng'olyootap Kamuktaindet, ak kogim, ak ko ng'atip kosiir rotwetap chok ne ng'atiben komoswek tuwai, ak kotoorei agoi koobeesyo saboondo ak sabeet, ak ole tuiyechin kawek ak amseet, ak chepchep koguiyo kabwaatutik ak magutigap muguleldo.

¹³ Ama mi kiy age tugul ne ki kiyai ne ma taagu eng' tainnyi: ago ng'ang'otin ak yaatatin tuguuk tugul eng' taitap koonyek che po ineendet ne tuun kitetyini atebosyekyok.

Jeso, Tisiindet Ne Oo

¹⁴ Amu ki tinyei tisiindet ne oo ne kigochut kipsengwet, Jeso Weeriitap Kamuktaindet, ongenam miising' ng'ang'ennyo.

¹⁵ Amu ma ki tinyei tisiindet ne oo ne ma imuuchi kogaswech nyalulnatosyekyok; ago ne ki kiyoom ko uu acheek eng' tuguuk tugul, ama yai tengek.

¹⁶ Ongeriikyi anyun ng'echereet ne po myeeindo eng' nyiganateet, si kenyooru rireenetapkei, ak kesich myeeindo ne toretech eng' peetuut ne kinyalili.