HEBRANIK 3 - BUKUIT NE TILIIL Sireet ne Dutero Kanon

Oo Kristo kosiir Musa

¹ Nooto anyun, che kitupche che tiliileen, yamdoigap kuurseetap kipsengwet, obwaat miising' Kayooktoindet ak Tisiindet ne oo ne po ng'ang'ennyo, ineendet Jeso;

² ne ki ek ne kiyani eng' ineendet ne ki lewen, ko uu Musa agine eng' kootap Kamuktaindet tugul.

³ Amu ki kiit keele nyoljin toroornatet ne oo kosiir Musa, ko uu ye tinyei ineendet ne kiteechei koot teegisto kosiir koot.

⁴ Amu teechei chiito koot age tugul; ago ineendet ne kiteechei tuguuk tugul ko Kamuktaindet.

⁵ Ak ki ek Musa iman ne kiyani eng' kootap Kamuktaindet tugul ko uu kiboityot, agobo paornateet ne po tuguuchooto che kitun kemwa eng' let;

⁶ ago Kristo ko uu weeriit, ne pou koonnyi; acheek koonnyi, ngenam miising' nyiganatennyo ak toroornatetap kamang'unennyo agoi kagesunet.

Kateunet agobo uuindap muguleldo

⁷ Nooto anyun, ko uu ye mwaei Kabuuset ne Tiliil kole, Ngot ogas kutinnyi rani,

⁸ Ko matouiit mugulelwekwok, ko uu eng' kaiimset, Ko uu eng' peetuutap yoomseet eng' surkwen,

⁹ Ye kiyoma kwanisyekwok kotyema, Ak ki keer poisyonikyuk kenyiisyek artam.

¹⁰ Eng' nooto anyun ki anereekyi ibini, Ak ki ale, ichiliili kotugul eng' mugulelwekwak: Ago ki ma kongen ortinwekyuk;

¹¹ Ko uu ye ki ayosye eng' nereegekyuk ale, Ma itei icheek kamuung'ennyu.

¹² Oriipkei anyun che kitupche, si ma piit chii age tugul eng' okweek ne tinyei muguleldo ne ya ne po pistoet, koistoegei Kamuktaindet ne sabei:

¹³ ago oteechigei peetuut age tugul, eng' ye ta kemwaei keele rani; si ma kiuit chii age tugul eng' okweek amu kenisyetap tengekto:

¹⁴ amu kigeegu yamdoigap Kristo, ngenam miising' taunetap kamang'unennyo agoi kagesunet:

¹⁵ ye ta kemwaei keele, Ngot ogas kutinnyi rani, Ko matouiit mugulelwekwok, ko uu eng' kaiimset.

¹⁶ Amu ng'oo che kitagis ye kingo kas? Tos ma icheek tugul che ki mang'une Misiri eng' Musa?

¹⁷ Ak ng'oo che ki nereekyi ineendet kenyiisyek artam? Tos ma icheeget che kichalwogenso, che ki ibutyi muuswekwak surkwen?

¹⁸ Ak ng'oo che ki iyasyechi ineendet kole ma koi iit kamuung'ennyi, tos ma icheek che ki ingelelso?

¹⁹ Kigeere anyun keele ki ma imuuch icheek koit amu ma iyan.