HEBRANIK 2 - BUKUIT NE TILIIL Sireet ne Dutero Kanon

Kateunet

¹ Eng' nooto anyun kanyool kenam miising' kosiir tuguuchooto ki kegas, si ma kichuchuige.

² Amu ngo tononot ng'olyoot ne ki kimwau eng' malaikaisyek ak kigonyoor pistoet age tugul ak ngelelnateet melekto ne kageerchinet ne po imanda;

³ kechilildoi ano anyun, ngemete yetunet ne oo ne tee ni? Ne kiga kisip kemwa eng' Kiptaiyat, ak ki igimitwech icheek che ki kas;

⁴ ak kibaoryani agine Kamuktaindet kobooto icheeget, eng' kaboorunoik ak kwang'utik, ak eng' kamugosyek che teerchiin, ak eng' kagoitaosyegap Kabuuset ne Tiliil, ko uu magennyi.

Tononjinindetap saruunet

⁵ Amu ma igoochi malaikaisyek koboi ng'wonyut ne nyoonei, nooto kimwae.

⁶ Ago paoryani chiito age eng' komosta age, kole, Nee chii, ne tos ibwaat? Anan weeriitap chii, ne tos irutoochi?

⁷ Ki iyai ineendet koming'init kitigin eng' malaikaisyek; Ilaakyini ineendet kuutweetap toroornatet ak teegisto, Ak ki inde koboi poisyonigap euneguk:

⁸ Ki inde tuguuk tugul kogas iit eng' keldebesaigap keelyekyik. Eng' nooto anyun ko uu ye ki inde tuguuk tugul kogas iit ineendet, ko ki ma ituch kiy ne ma kas iit ineendet. Ago nguno ko tomo kegeer kogas iit tuguuk tugul ineendet.

⁹ Ago kigeere ineendet ne ki kiyai koming'init kitigin eng' malaikaisyek, ineendet Jeso, ne ki kilaakyi kuutweet ne po toroornatet ak teegisto amu nyalilda ne po meet, si kobiit kochamcham meet eng' myeeindap Kamuktaindet agobo chii age tugul.

¹⁰ Amu kinyolji ineendet, ne mi tuguuk tugul amu ineendet ak kobunu ineendet tuguuk tugul, ye imutyin weeriik che chaang' toroornatet, si koyai taunindetap yetunennywa koek ne ititaat eng' nyalilwogik.

¹¹ Amu ineendet ne itiliilisyei ak icheek che kitiliili kobunu agenge: eng' nooto anyun koma keerei ineendet kalilanet koguure icheek che kitupche,

¹² kole, Amwachini kaineng'ung' tupchosyekyuk, Atyeni kalasuneng'ung' eng' kwenutap tuiyet.

¹³ Ak kogeny, Amang'u ineendet. Ak kogeny, Keero, anee ak lagok che ki kogoono Kamuktaindet.

¹⁴ Amu yamdoi anyun lagok korotiik ak poorto, ki nam chooto ineendet agine ko uu nooto; si kobiit kong'em eng' ooreetap meet ineendet ne tinyei kimnateetap meet, nooto ko chesawilyet;

¹⁵ si kobiit kotyach icheek tugul che ki ratotiin peetuusyekwak tugul eng' kaiyweisyetap meet.

¹⁶ Amu iman ma namei itoondap malaikaisyek, ago ki nam kesweegap Abraham.

¹⁷ Eng' nooto anyun kinyolji keyai ineendet eng' tuguuk tugul kogergeit ak tupchosyekyik, si kobiit koek tisiindet ne oo ne po rireenetapkei ak ko po iman eng' tuguuk che tokyingei Kamuktaindet, si kobiit koyai tisiisyet agobo tengekwogigap piik.

¹⁸ Amu ko uu ye kinyalil ineendet ye ki kiyomei, komuuchi ineendet kotoret icheek che kiyomei.