HEBRANIK 13 - BUKUIT NE TILIIL Sireet ne Dutero Kanon

Katigonutik che toretisye kotugul

¹ Ingotep ko uu nooto chamyetap che kitupche.

² Amoutye oboorchi toek chamyet: amu ki kotaach alak malaikaisyek eng' nooto amaingen.

³ Obwaat icheek che mi eng' ratisyosyek, ko uu ne oo ratotiin tugul; icheeget che kinyaliili, ko uu ye omi ak okweek eng' poorto.

⁴ Ingogonyit tugul katunisyet, amat koek itoogut ne tinyei simdo: amu tuun irwookyin Kamuktaindet che soksei ak che ibegei.

⁵ Oegu che ityagatin eng' chametap silingisyek; ingoyamak tuguuk che otinye; amu ki komwa ineendet kole, “Ma koi abagaakteen, ma koi ameteen.”

⁶ Nooto anyun kimwae eng' nyiganateet ne myee keele, Toretindennyu Kiptaiyat; maiyweisyei: Yaiywo nee chii?

⁷ Obwaat icheek che ki indoiywok, che kimwaiwok ng'olyootap Kamuktaindet; ye obwaati ole kiteptoi atebosyekwak, oyai ko uu ye kiyaei icheek eng' kayanennywa.

⁸ Kergei Jeso Kristo eng' amut ak ra, ak agoi koigeny.

⁹ Amatata ongobeetook kaneetisyosyek che pesyotin che teer: amu myee kolumdaak muguleldo eng' myeeindo; ma eng' amitwogik, che ki ma keljine kiy icheek che kiga pendate chooto.

¹⁰ Ki tinyei kaptisisyet, ne ma tinyei kimnateet koamisye icheek che poisye emait.

¹¹ Amu poorwegap tyong'ichooto ki ibu tisiindet ne oo korotiikwak kobwa ole-tiliil agobo tengekto, kebeelei eng' nganaseet saang'.

¹² Nooto anyun, kinyalil Jeso agine eng' ormariich saang', si kobiit kotiliil piik eng' korotiikyik.

¹³ Ongebe anyun ole mi ineendet eng' saang'utap ormariich, keibe teweernateet ne kiteweeri ineendet.

¹⁴ Amu ma ki tinyei eng' yu nganaseet ne tebyei koigeny, ago kicheeng'e nin nyoonei.

¹⁵ Nooto anyun ongigoochi Kamuktaindet eng' ineendet korosyotap kalasunet kotugul, nooto ko logoiyatap kutusweek che ng'aanyei kainennyi.

¹⁶ Oyai che myachen, amoutye oyai yamdaet: amu paibai miising' Kamuktaindet eng' koroseek che uu chooto.

¹⁷ Ogas iit che indoiywok, ak oming'inityige icheek: amu riipsei agobo saboonwekwok, ko uu che tuun tetu agobo poisyennywa; si kobiit koyai poisyoniito eng' poiboiyet, ama eng' arageneet: amu magelwok kiy eng' nooto.

¹⁸ Osaa agobo acheek: amu kiyani keele ki tinyei kabwaatet ne myee, kimache ketebi eng' atebeet ne myee eng' tuguuk tugul.

¹⁹ Ak asoome miising' kot ale oyai ko uu nooto, si kobiit kesip keeweekyo oldang'wong'.

Saaet

²⁰ Ingoyaak Kamuktaindet ne po kaalyeet, ne ki imut mestowot ne oo ne po keechiirek komong' eng' che ki pek, eng' korotiik che po kayomiset ne po koigeny, ineendet Kiptaiyandennyo Jeso,

²¹ oegu che ochobootiin eng' poisyet age tugul ne myee si oyai magennyi, koyai eng' icheek che chamaksei miising' eng' tainnyi, eng' Jeso Kristo; ne nenyi toroornatet koigeny ak koigeny. Amen.

Ng'aleek che po let

²² Ago asoomok miising', tupchosyechu, ale omuite eng' ng'olyootap kagimiitet: amu kaasirwak eng' ng'aleek tutigin.

²³ Onai ole ko kityaach tupchennyo Timoteo; ngot konyo ko neegit, ko tuun anyoo ageerok kobooto ineendet.

²⁴ Ogat tugul che indoiywok, ak tugul che tiliileen. Igatok che po Italy.

²⁵ Ingotep myeeindo kobootok okweek tugul. Amen.