HAGGAI 2 - BUKUIT NE TILIIL Sireet ne Dutero Kanon

Korooronindo ne po Koot ne leel

¹ eng' peetuutap tiptem ak agenge ne po arawetap tisap, ko ki nyo ng'olyootap Kamuktaindet ne Toroor eng' maotyot Haggai, kole:

² “Ng'alaalji Zerubabel weeriitap Shealtiel, pounindetap Judah, ak Joshua weeriitap Jehosadak tisiindet ne oo, kobooto piik che ki ng'et, ileenji:

³ ‘Ng'oo eng' okweek ne ki ng'et ne ki keer kooi kotinyei toroornatennyi ne po tai? Ak ogeertoi ano nguno? Tos ma uu puch eng' konyekwok?

⁴ Nyiganitu, ee Zerubabel,’ mwaei Kamuktaindet ne Toroor. ‘Nyiganitu, ee Joshua weeriitap Jehosadak tisiindet ne oo. Onyiganitu okweek piik tugul che po emet,’ mwaei Kamuktaindet ne Toroor, ‘ak oboisye; amu ami kobootok,’ mwaei Kamuktaindet ne Toroor ne po lugoosyek.

⁵ Niito ng'olyoot ne ki kiyomisyige ye ki obwane eng' Misiri, ak tebee kwenung'wong' Kabuusennyu ne Tiliil; amoiyweisye.

⁶ Mwaei Kamuktaindet ne Toroor ne po lugoosyek kole: ‘Eng' ne matya kota atumdumi kogeny konyil agenge kipsengwet ak ng'wony, nyanjet ak emet.

⁷ Atumdumi pororyosyek tugul, ak kobwa tuguuk che chamei pororyosyek tugul, ak anyiit kooi toroornatet,’ mwaei Kamuktaindet ne Toroor ne po lugoosyek.

⁸ ‘Chechuuk fedhaisyek, ak chechuuget thahabusyek ak icheek.

⁹ Eetu toroornatet ne po let ne po kooi kosiir ne po tai, ak agoonu kaalyeet eng' yuto,’ ” mwaei Kamuktaindet ne Toroor ne po lugoosyek.

¹⁰ Eng' peetuutap tiptem ak ang'wan ne po arawetap sogool, eng' kenyiit ne po aeng' ne po Darius ko ki nyo ng'olyootap Kamuktaindet ne Toroor eng' maotyot Haggai kole:

¹¹ “Mwaei Kamuktaindet ne Toroor ne po lugoosyek kole: oteebe tisiik agobo ng'atuutik, oleenji:

¹² Ngot koibe chiito ngoryennyi panyeek che itabaanatiin, ak kotiiny ngoryonooto magatyat, anan sogoryek, anan divaik, anan mwanik, anan amit age tugul, ko tos tiliiliitu?” Ak ki wol tisiik kole, “Achicha.”

¹³ Yeityo komwa Haggai kole, “Ngot kotiiny chii age tugul ne ng'waan ne kitwa muusto, age eng' tuguuchuuto, ko tos ng'wanitu?” Ak ki wol tisiik kole, “Ng'wanitu.”

¹⁴ Kowol anyun Haggai kole, “Uu nooto pichu ak uu nooto pororyoni eng' tainnyu,” mwaei Kamuktaindet ne Toroor, “Ak uu nooto poisyet age tugul ne po eunekwak; ng'waan kiit ne igoitoi eng' olooto.”

Koyomisei Kamuktaindet ne Toroor kaberuret

¹⁵ Ak asoomok anyun nguno, ale obwaat kobooch peetuuniito ak kwo tai, kobooch peetuut ne ki kinde koita agenge paragutap koita age eng' hekaluutap Kamuktaindet ne Toroor.

¹⁶ Ye kingwo chii kocheeng' karurugutyetap keruutik tiptem, konyooru ne po keruutik taman kityo. Kingwo ole kitaage divaik kole koip tereenik konom, ko ki mi tiptemu icheegei.

¹⁷ Ki abirenok chelalityet ak uchatet ak koigap ropta eng' poisyonik tugul che po eunekwok; ago ma oweekyagei, mwaei Kamuktaindet ne Toroor.

¹⁸ Asoomok ale, obwaat, kobooch peetuuni ak kwo tai, kobooch peetuutap tiptem ak ang'wan ne po arawetap sogool, kobooch peetuut ne ki kilumee lumeiywotap Hekaluutap Kamuktaindet ne Toroor, obwaat anyun.

¹⁹ Tos ta komi peek choge? Ee, ma iiyo keetiigap sabibuk, anan mogoonik, anan keetiigap logoek alak, anan mseituni. Aberuurok anyun kobooch peetuuni.

Arorutyet agobo Zerubabel

²⁰ Ki nyoonji `ng'olyootap Kamuktaindet ne Toroor Haggai ne po aeng', eng' peetuutap tiptem ak ang'wan ne po arawetap sogool, kole:

²¹ “Ng'alaalji Zerubabel, pounindetap Judah, ileenji atumdumi kipsengwet ak ng'wony.

²² Agabui ng'echereetap laitornatet ne po pounatosyek, ak ang'eme kimnateetap pounatosyegap pororyosyek. Agabui kariisyek che po lugeet kobooto che laanyei; ak kobutyo paraisisyek kobooto che laanyei, ki parei age tugul eng' rotwetap chok ne po tupchennyi.

²³ ‘Eng' peetuunooto, anamin ee Zerubabel otwogindennyu, weeriitap Shealtiel, ak ayain iige ng'ookset, amu ki alewenin,’ ” mwaei Kamuktaindet ne Toroor ne po lugoosyek.