GALATYEK 1 - BUKUIT NE TILIIL Sireet ne Dutero Kanon

Kagateet

¹ Paulo, kayooktoindet, ama ne po piik, ama kiyok eng' chii, ago eng' Jeso Kristo, ak Kamuktaindet Kwanda, ne ki ing'eet ineendet komong' eng' che ki pek,

² ak tupchosyek tugul che mi kobooto, kisirchini kanisosyek che po Galatia.

³ Ingotep kobootok myeeindo ak kaalyeet ne punu Kamuktaindet Kwanda, ak Kiptaiyandennyo Jeso Kristo,

⁴ ne ki igoitogei agobo tengekwogikyok, si kobiit kosarwech eng' peetuusyechu yaacheen, ko uu mageetap Kamuktaindet nenyo ak ko Kwandanyo:

⁵ nenyi toroornatet koigeny ak koigeny. Amen.

Ma mi logoiywek alak che teer

⁶ Akwong'e amu oistoige ochoktoi eng' ineendet ne kiguurok eng' myeeindap Kristo, obe ye mi logoiywek che myach che teer;

⁷ che ma teer: kobatee mi alage che iimok, ak machei kowal logoiywek che myach che po Kristo.

⁸ Agot ngo acheek, anan malaikaiyat ne punu kipsengwet, ne tos amwok logoiywek alak tugul che myach che teer eng' chooto che kigeamwok, ko ingoek ne chuboot ineendet.

⁹ Ko uu ye kiga kemwa eng' tai, amwae nguno kogeny ko uu nooto ale, ngot koamwok chii age tugul logoiywek alak tugul che myach che teer eng' chooto ki otaach, ko ingoek ne chuboot ineendet.

¹⁰ Tos agoigoi nguno piik anan Kamuktaindet? Anan acheeng'e abaibai piik? Ngot kota aboiboi piik, koma aa otwogetap Kristo.

¹¹ Amu aboorwok anyun, che kitupche, agobo logoiywek che myach che ki aamdoi, ale ma punu chii.

¹² Amu ki ma ataach eng' chii, ama kineta, ago eng' ng'ang'utyetap Jeso Kristo.

¹³ Amu ki ogas agobo atebeennyu eng' peetuusyek che ki kosiirto eng' kayaneetap Yahudik, ko uu ye ki ausausi kanisetap Kamuktaindet kot kosiir, ak ki ang'emang'emi:

¹⁴ ak ki atese tai eng' kayaneetap Yahudik kosiir siritoikyuk che chaang' eng' piigap emennyu agiiligei miising' kosiir agobo pitonwegap kwanisyekyuk.

¹⁵ Ago ye kingo cham Kamuktaindet, ne kiitabaana, kobooch moetap kamennyu, ak koguura eng' myeeindonyi,

¹⁶ si kong'aany Weeriinnyi eng' anee, si kobiit aamda ineendet eng' Pororyosyek; ki ma king'alaal anyun ak chii eng' sainooto:

¹⁷ ama atogoste Jerusalem ole mi icheek che kisip koek che kiyooktoi eng' anee: ago ki awe Arabia; ak ki aweege agoi Damasko.

¹⁸ Kingo keskei anyun kenyiisyek somogu atogoste awe Jerusalem si aboorchigei Kepas, ak abeni oldanyi peetuusyek taman ak muut.

¹⁹ Ago ma ageer alak eng' che kiyooktoi, kobatee Jakobo ne tupcho ak Kiptaiyat.

²⁰ Ara anyun, eng' tuguuk che asirwok, ogeero, eng' taitap Kamuktaindet koma mwaei lembech.

²¹ Yeityo anyoo korotinwegap Syria ak Cilicia.

²² Ak kitom kogeero togoch kanisosyegap Judea che ki mi eng' Kristo:

²³ ago ki kas kemwaei kityo keele, Ineendet ne kiuseech eng' peetuusyek alak koamdoi nguno kayanonooto king'emang'emi;

²⁴ ak kiitoroor icheek Kamuktaindet eng' anee.